മുഹമ്മദ് ബിൻ ഹനഫിയ്യ(റ)യുടെ അവസ്ഥയെക്കുറിച്ച് തിരുനബിﷺ മുൻകൂട്ടി അറിയിച്ചത്.
ഇമാം ബൈഹഖി(റ) അലി(റ)വിൽ നിന്ന് നിവേദനം ചെയ്യുന്നു, അദ്ദേഹം പറഞ്ഞു: തിരുനബിﷺ എന്നോട് പറഞ്ഞു: “എനിക്ക് ശേഷം നിനക്കൊരു ആൺകുട്ടി ജനിക്കും, അവന് ഞാൻ എന്റെ പേരും എന്റെ ഉപനാമവും സമ്മാനിച്ചിരിക്കുന്നു.”
സ്വിലത് ബിൻ അശ്യം(റ), വഹ്ബ്, അൽ-ഖുറദ്വി, ഗൈലാൻ, അൽ-വലീദ് എന്നിവരെക്കുറിച്ച് നബിﷺ മുൻകൂട്ടി ഇപ്രകാരം പറഞ്ഞു.
ഇബ്നു സഅ്ദും(റ), ബൈഹഖി(റ)യും, അബൂ നുഐമും(റ) ഇബ്നുൽ മുബാറക്(റ) വഴി അബ്ദുറഹ്മാൻ ബിൻ യസീദ് ബിൻ ജാബിറി(റ)ൽ നിന്ന് നിവേദനം ചെയ്യുന്നു; അദ്ദേഹം പറഞ്ഞു: തിരുനബിﷺ ഇപ്രകാരം പറഞ്ഞു. “എന്റെ സമുദായത്തിൽ ‘സ്വിലത് ബിൻ അശ്യം(റ)’ എന്ന് പേരുള്ള ഒരു മനുഷ്യൻ ഉണ്ടാകും. അദ്ദേഹത്തിന്റെ ശിപാർശ കാരണം ഇത്രയിത്ര ആളുകൾ സ്വർഗ്ഗത്തിൽ പ്രവേശിക്കും.”
ഇമാം ഇബ്നു അദിയ്യും(റ) ബൈഹഖി(റ)യും ഉബാദത്ത് ബിൻ സ്വാമിത്(റ)വിൽ നിന്ന് നിവേദനം ചെയ്യുന്നു; തിരുനബിﷺ പറഞ്ഞു: “എന്റെ സമുദായത്തിൽ ‘വഹ്ബ്’ എന്ന് പേരുള്ള ഒരു മനുഷ്യൻ ഉണ്ടാകും, അല്ലാഹു അദ്ദേഹത്തിന് തത്വജ്ഞാനം പ്രദാനം ചെയ്യും. അതുപോലെ ‘ഗൈലാൻ’ എന്ന് പേരുള്ള മറ്റൊരു മനുഷ്യനും ഉണ്ടാകും; അവൻ ജനങ്ങൾക്ക് ഇബ്ലീസിനേക്കാൾ ഉപദ്രവകാരിയായിരിക്കും.”
ഇമാം ബൈഹഖി(റ) അബൂഹുറൈറ(റ)വിൽ നിന്ന് നിവേദനം ചെയ്യുന്നു; തിരുനബിﷺ പറഞ്ഞു. “സിറിയ ഉൾപ്പെടുന്ന പ്രദേശത്ത് പിശാച് ഒരു കൂവൽ കൂവും; അതോടെ അവിടുത്തെ മൂന്നിൽ രണ്ട് ഭാഗം ആളുകളും ഖദ്റിനെ അഥവാ വിശ്വാസ കാര്യങ്ങളിലെ അല്ലാഹുവിന്റെ മുൻവിധിയെ നിഷേധിക്കും.”
ഇമാം ബൈഹഖി(റ) പറയുന്നു: ഖദ്രിയ്യാ ചിന്താഗതിക്കാരനായ ‘ഡമാസ്കസുകാരൻ ഗൈലാൻ അദ്ദിമശ്ഖി’യിലേക്കാണ് ഇതിൽ സൂചനയുള്ളത്.
ഇബ്നു സഅ്ദും(റ) ബൈഹഖി(റ)യും അബൂ ബുർദ അുള്ളഫരി(റ)വിൽ നിന്ന് നിവേദനം ചെയ്യുന്നു; അദ്ദേഹം പറഞ്ഞു: തിരുനബിﷺ ഇപ്രകാരം പറയുന്നത് ഞാൻ കേട്ടു: “രണ്ട് കാഹിനുകളിൽ അഥവാ യഹൂദ ഗോത്രങ്ങളിൽ ഒന്നിൽ നിന്ന് ഒരു മനുഷ്യൻ പുറപ്പെടും. അദ്ദേഹം ഖുർആൻ പഠിക്കുകയും പാരായണം ചെയ്യുകയും ചെയ്യും; അദ്ദേഹത്തിന് ശേഷം മറ്റാരും പഠിക്കാത്ത അത്രയും ആഴത്തിൽ അദ്ദേഹം അത് ഗ്രഹിക്കും.”
ഇമാം നാഫിഅ് ബിൻ യസീദ്(റ) പറയുന്നു: ഞങ്ങൾ പറയാറുണ്ടായിരുന്നു അത് ‘മുഹമ്മദ് ബിൻ കഅ്ബ് അൽ-ഖുറദ്വി’ ആണെന്ന്. ഇവിടെ ‘കാഹിനുകൾ’ അഥവാ ജോത്സ്യന്മാർ എന്ന് ഉദ്ദേശിച്ചത് ബനൂ ഖുറൈദ, ബനൂ നളീർ എന്നീ രണ്ട് യഹൂദ ഗോത്രങ്ങളെയാണ്.
ബൈഹഖി(റ) തന്നെ ഇത് താബിഈ നേരിട്ട് നിവേദനം ചെയ്യുന്ന പരമ്പരയോടെ ഈ വാചകത്തിലും നിവേദനം ചെയ്തിട്ടുണ്ട്: “രണ്ട് കാഹിനുകളിൽ ഒരാളിൽ ഒരു മനുഷ്യൻ ഉണ്ടാകും, അദ്ദേഹം ഖുർആൻ പഠിപ്പിക്കും; അദ്ദേഹമല്ലാതെ മറ്റാരും അപ്രകാരം പഠിപ്പിക്കുകയില്ല.” നിവേദകൻ പറയുന്നു: അത് മുഹമ്മദ് ബിൻ കഅ്ബ് അൽ-ഖുറദ്വി ആണെന്നാണ് അവർ കരുതിയിരുന്നത്. രണ്ട് കാഹിനുകൾ എന്നത് ഖുറൈദയും നളീറുമാണ്.
اَللّٰهُمَّ صَلِّ عَلَى سَيِّدِنٰا مُحَمَّدٍ وَعَلَى آلِهِ وَصَحْبِهِ وَسَلِّمْ