ഇമാം ത്വബ്റാനി(റ) സ്വീകാര്യമായ പരമ്പരയോടെ അനസ്(റ)വിൽ നിന്ന് നിവേദനം ചെയ്യുന്നു: യമാമ യുദ്ധദിവസം സാബിത് ബിൻ ഖൈസ് ബിൻ ശമ്മാസ്(റ) തന്റെ കഫൻപുടവ ധരിച്ച്, സുഗന്ധദ്രവ്യങ്ങളും പൂശി കടന്നുവന്നു. എന്നിട്ട് അദ്ദേഹം പ്രാർത്ഥിച്ചു: “അല്ലാഹുവേ! ഈ ബഹുദൈവാരാധകർ കൊണ്ടുവന്നതിൽ നിന്നും ഞാൻ നിന്നിലേക്ക് ഒഴിഞ്ഞുമാറുന്നു. മുസ്ലിംകളിൽ ചിലർ കാണിച്ച അലസതയിൽ ഞാൻ നിന്നോട് ഖേദം പ്രകടിപ്പിക്കുന്നു.” തുടർന്ന് അദ്ദേഹം യുദ്ധം ചെയ്ത് രക്തസാക്ഷിയായി. അദ്ദേഹത്തിന് ഒരു അങ്കിയുണ്ടായിരുന്നു, അത് മോഷ്ടിക്കപ്പെട്ടു. പിന്നീട് ഒരാൾ അദ്ദേഹത്തെ സ്വപ്നത്തിൽ കണ്ടു. അപ്പോൾ അദ്ദേഹം പറഞ്ഞു: “എന്റെ അങ്കി ഇന്നയിന്ന സ്ഥലത്ത് അടുപ്പിന് താഴെയുള്ള ഒരു പാത്രത്തിലുണ്ട്.” കൂടാതെ അദ്ദേഹം ചില വില്പത്രങ്ങൾ കൂടി ആ വ്യക്തിയെ ഏൽപ്പിച്ചു. അവർ ആ അങ്കി തിരഞ്ഞപ്പോൾ അത് അവിടെത്തന്നെ കണ്ടെത്തുകയും അദ്ദേഹത്തിന്റെ വസ്വിയ്യത്തുകൾ നടപ്പിലാക്കുകയും ചെയ്തു.
ഇമാം ത്വബ്റാനി(റ) മികച്ച പരമ്പരയോടെ ഉർവ(റ)വിൽ നിന്ന് നിവേദനം ചെയ്യുന്നു, അദ്ദേഹം പറഞ്ഞു: “ഹിജ്റ പന്ത്രണ്ടാം വർഷം യമാമ യുദ്ധത്തിലാണ് സാബിത്(റ) കൊല്ലപ്പെട്ടത്.”
വരുംകാലത്ത് സംഭവിക്കാനിരിക്കുന്ന മതഭ്രഷ്ടിനെ കുറിച്ച് തിരുനബിﷺ മുൻകൂട്ടി പറഞ്ഞ ചില കാര്യങ്ങൾ ഇങ്ങനെ വായിക്കാം.
ഇമാം അഹ്മദ്(റ), ബുഖാരി(റ), മുസ്ലിം(റ), നസാഈ(റ), ഇബ്നു മാജ(റ), ദാരിമി(റ), ഇബ്നു ഹിബ്ബാൻ(റ) എന്നിവർ അബൂ സുർഅ ബിൻ അംറ് ബിൻ ജരീറി(റ)ൽ നിന്ന് അദ്ദേഹത്തിന്റെ പിതാമഹൻ വഴിയും; ഇബ്നു അബീ ശൈബ(റ), ഇമാം അഹ്മദ്(റ), ബുഖാരി(റ), നസാഈ(റ), അബൂദാവൂദ്(റ), ഇബ്നു മാജ(റ) എന്നിവർ ഇബ്നു ഉമർ(റ)വിൽ നിന്നും; ബുഖാരി(റ)യും നസാഈ(റ)യും അബൂബക്റ(റ)വിൽ നിന്നും; ബുഖാരി(റ)യും തിർമിദി(റ)യും ഇബ്നു അബ്ബാസ്(റ)വിൽ നിന്നും; ത്വബ്റാനി(റ) തന്റെ ‘കബീർ’ എന്ന ഗ്രന്ഥത്തിൽ അബൂസഈദ്(റ), അബൂ ഉമാമ(റ) എന്നിവരിൽ നിന്നും; ഇമാം അഹ്മദും(റ) ത്വബ്റാനി(റ)യും അബൂ മസ്ഊദ്(റ)വിൽ നിന്നും; ദാറഖുത്നി(റ) തന്റെ ‘ഇഫ്റാദ്’ എന്ന ഗ്രന്ഥത്തിൽ ഉസാമ ബിൻ സെയ്ദ്(റ)വിൽ നിന്നും നിവേദനം ചെയ്യുന്നു; തിരുനബിﷺ പറഞ്ഞു. “എനിക്ക് ശേഷം നിങ്ങൾ പരസ്പരം കഴുത്തറുക്കുന്ന സത്യനിഷേധികളായി മാറിപ്പോകരുത്.”
ഇതേ ഹദീസ് നസാഈ(റ) ഇബ്നു ഉമർ(റ)വിൽ നിന്ന് നിവേദനം ചെയ്തതിൽ ഈ ഭാഗം കൂടി അധികമായിട്ടുണ്ട്: “ഒരു മനുഷ്യനും തന്റെ പിതാവിന്റെ കുറ്റത്തിനോ, തന്റെ സഹോദരന്റെ കുറ്റത്തിനോ ശിക്ഷിക്കപ്പെടാൻ പാടില്ല.”
മുസ്ലിമും(റ) തിർമിദി(റ)യും സൗബാൻ(റ)വിൽ നിന്ന് നിവേദനം ചെയ്യുന്നു, തിരുനബിﷺ പറഞ്ഞു.
“എന്റെ സമുദായത്തിലെ ചില ഗോത്രങ്ങൾ ബഹുദൈവാരാധകരോട് ചേരുന്നത് വരെയും, അവർ വിഗ്രഹങ്ങളെ ആരാധിക്കുന്നത് വരെയും അന്ത്യനാൾ സംഭവിക്കുകയില്ല.”
മുസ്ലിം(റ) അബൂഹുറൈറ(റ)വിൽ നിന്ന് നിവേദനം ചെയ്യുന്നു, തിരുനബിﷺ പറഞ്ഞു. “അറിയുക, വഴിതെറ്റിയ ഒട്ടകത്തെ ആട്ടിയോടിക്കുന്നത് പോലെ ചില ആളുകൾ എന്റെ അൽ-കൗസർ ഹൗളിൽ നിന്ന് ആട്ടിയോടിക്കപ്പെടും. അപ്പോൾ ഞാൻ അവരെ വിളിക്കും: ‘അറിയുക, ഇങ്ങോട്ട് വരൂ!’ അപ്പോൾ പറയപ്പെടും: ‘തീർച്ചയായും അവർ തങ്ങൾക്ക് ശേഷം ദീൻ മാറ്റിമറിച്ചു.’ അപ്പോൾ ഞാൻ പറയും: ‘നാശം! അവർക്ക് നാശം ഉണ്ടാകട്ടെ!'”
ബുഖാരി(റ)യും മുസ്ലിമും(റ) ഇബ്നു അബ്ബാസ്(റ)വിൽ നിന്ന് നിവേദനം ചെയ്യുന്നു, തിരുനബിﷺ പറഞ്ഞു.
“അറിയുക! എന്റെ ഉമ്മത്തിൽ പെട്ട ചില ആളുകളെ പരലോകത്ത് ഹാജരാക്കപ്പെടുകയും അവരെ ഇടതുപക്ഷത്തേക്ക് പിടിച്ചു കൊണ്ടുപോവുകയും ചെയ്യും. അപ്പോൾ ഞാൻ പറയും: ‘എന്റെ പ്രിയ അനുചരന്മാരേ!’ അപ്പോൾ പറയപ്പെടും: തങ്ങൾക്ക് ശേഷം അവർ എന്തൊക്കെ പുതുതായി ഉണ്ടാക്കിയെന്ന് അവിടുത്തേക്ക് അറിയില്ല.’ അപ്പോൾ സദ്വൃത്തനായ ആ ദാസൻ ഈസാ നബി(അ) പറഞ്ഞതുപോലെ ഞാൻ പറയും: ‘ഞാൻ അവർക്കിടയിൽ ഉണ്ടായിരുന്ന കാലമത്രയും ഞാൻ അവരുടെ മേൽ സാക്ഷിയായിരുന്നു. എന്നാൽ നീ എന്നെ മരിപ്പിച്ചപ്പോൾ നീ മാത്രമായിരുന്നു അവരുടെ മേൽ നോട്ടക്കാരൻ.’ അപ്പോൾ പറയപ്പെടും: ‘തീർച്ചയായും നിങ്ങൾ അവരിൽ നിന്ന് വേർപിരിഞ്ഞത് മുതൽ അവർ തങ്ങളുടെ പിന്നാമ്പുറങ്ങളിലേക്ക് മതത്യാഗികളായി മടങ്ങിക്കൊണ്ടേയിരുന്നു.'”
اَللّٰهُمَّ صَلِّ عَلَى سَيِّدِنٰا مُحَمَّدٍ وَعَلَى آلِهِ وَصَحْبِهِ وَسَلِّمْ