നാം വായിച്ചുകൊണ്ടിരിക്കുന്ന മുഅ്ജിസത്ത് അധ്യായത്തിൽ ചില അനുബന്ധങ്ങൾ കൂടി നമുക്ക് ചേർക്കാം.
ഒന്ന്: ഇബ്നുസ്സ്വലാഹ്(റ) തന്റെ ‘ഫതാവ’യിൽ പറയുന്നു: തിരുനബിﷺയുടെ മുഅ്ജിസത്തുകൾ പൂർണ്ണമായി ശേഖരിക്കാൻ ചില പണ്ഡിതന്മാർ മുന്നോട്ടുവരികയും ആയിരത്തോളം മുഅ്ജിസത്തുകൾ അവർ ക്രോഡീകരിക്കുകയും ചെയ്തു. എന്നാൽ, ആ എണ്ണം പോലും കുറവാണെന്നാണ് ഞങ്ങൾ കരുതുന്നത്. കാരണം, മുഅ്ജിസത്തുകൾ അതിന്റെ എണ്ണമറ്റ ഇരട്ടികളാണ്. അവ തിരുനബിﷺയുടെ കാലത്ത് നടന്നവയിൽ മാത്രം പരിമിതമല്ല. മറിച്ച്, അവിടുത്തെ ശേഷം കാലാകാലങ്ങളിൽ അവ പുതുക്കപ്പെട്ടുകൊണ്ടേയിരിക്കുന്നു. അവിടുത്തെ ഉമ്മത്തിലെ ഔലിയാക്കൾക്കുണ്ടാകുന്ന ‘കറാമത്തുകളും’ യുദ്ധങ്ങളിലും മറ്റു പ്രയാസകരമായ സാഹചര്യങ്ങളിലും തിരുനബിﷺയെ മുൻനിർത്തി പ്രാർത്ഥിക്കുന്നവർക്ക് ലഭിക്കുന്ന സഹായങ്ങളും തിരുനബിﷺയുടെ പ്രവാചകത്വത്തിനുള്ള വ്യക്തവും ശക്തവുമായ തെളിവുകളാണ്. ഒരൊറ്റ കണക്കെടുപ്പുകാരനും അവയെ ക്രോഡീകരിക്കാനോ എണ്ണാനോ സാധിക്കില്ല.
രണ്ട്: മുഅ്ജിസത്ത്, സിഹ്ർ/മന്ത്രവാദം, കറാമത്ത് എന്നിവ തമ്മിലുള്ള വ്യത്യാസത്തെക്കുറിച്ച് ഒരു സംഘം പണ്ഡിതന്മാർ വിശദീകരിച്ചിട്ടുണ്ട്. ഇമാം മാസരി(റ) പറയുന്നു: “സിഹ്ർ എന്നത് ചില പ്രത്യേക വാക്കുകളിലൂടെയും പ്രവൃത്തികളിലൂടെയും അധ്വാനിച്ച് നേടിയെടുക്കുന്ന ഒന്നാണ്. എന്നാൽ കറാമത്തിന് ഇത്തരം അധ്വാനങ്ങൾ ആവശ്യമില്ല, മറിച്ച് അത് യാദൃച്ഛികമായി സംഭവിക്കുന്നതാണ്. മുഅ്ജിസത്താകട്ടെ, ‘വെല്ലുവിളി’ ഉള്ളതുകൊണ്ട് കറാമത്തിൽ നിന്ന് വ്യത്യസ്തമാകുന്നു.”
ഇമാമുൽ ഹറമൈനി(റ) ഉദ്ധരിക്കുന്നത് ഇപ്രകാരമാണ്: “സിഹ്ർ /മന്ത്രവാദം ഒരു പാപിയുടെ കൈകളിലൂടെ മാത്രമേ വെളിപ്പെടുകയുള്ളൂ എന്നതിലും, കറാമത്ത് ഒരിക്കലും ഒരു പാപിയിലൂടെ വെളിപ്പെടില്ല എന്നതിലും പണ്ഡിതന്മാരുടെ ഏകാഭിപ്രായമുണ്ട് .” ഇമാം നവവി(റ)യും ‘റൗള’യിൽ സമാനമായ അഭിപ്രായം രേഖപ്പെടുത്തിയിട്ടുണ്ട്.
അസാധാരണമായ കാര്യങ്ങൾ ആരിലൂടെയാണോ വെളിപ്പെടുന്നത്, അവരുടെ അവസ്ഥ നോക്കിയാണ് അത് എന്ത് വിഭാഗമാണെന്ന് തീരുമാനിക്കേണ്ടത്. ആ വ്യക്തി ശരീഅത്ത് മുറുകെ പിടിക്കുകയും വൻപാപങ്ങളിൽ നിന്ന് അകന്നുനിൽക്കുകയും ചെയ്യുന്നവനാണെങ്കിൽ അത് ‘കറാമത്ത്’ ആണ്. അല്ലാത്തപക്ഷം അത് ‘സിഹ്ർ’ /മന്ത്രവാദം ആണ്. പിശാചുക്കളുടെ സഹായത്താലോ മറ്റോ ഉണ്ടാകുന്നതാണ് സിഹ്ർ. എന്നാൽ അതിന്റെ സൂക്ഷ്മത കാരണം ചുരുക്കം ചില ആളുകൾക്കേ അത് തിരിച്ചറിയാൻ കഴിയൂ. വസ്തുക്കളുടെ സവിശേഷതകൾ തിരിച്ചറിയുന്നതും അവയുടെ കൂടിച്ചേരലുകളെയും സമയങ്ങളെയും കുറിച്ചുള്ള അറിവുമാണ് അതിന്റെ അടിസ്ഥാനം.
സിഹ്റിൽ അധികവും യാഥാർത്ഥ്യമില്ലാത്ത വെറും തോന്നലുകളും ഭ്രമങ്ങളുമാണ്. ഇതിനെക്കുറിച്ച് അറിവില്ലാത്തവർക്ക് ഇത് വലിയ കാര്യമായി തോന്നും. ഫിർഔന്റെ മന്ത്രവാദികളെക്കുറിച്ച് അല്ലാഹു പറഞ്ഞതുപോലെ: “അവർ വലിയൊരു മന്ത്രവാദം കൊണ്ടുവന്നു.” യഥാർത്ഥത്തിൽ അവരുടെ കയറുകളും വടികളും വെറും കയറുകളും വടികളും തന്നെയായിരുന്നു അഥവാ അവ പാമ്പുകളായി മാറിയിരുന്നില്ല. എങ്കിലും സത്യസന്ധമായ വശം ഇതാണ്: സിഹ്റിന് മനുഷ്യന്റെ ഹൃദയങ്ങളിൽ സ്വാധീനം ചെലുത്താനും സ്നേഹം, ദേഷ്യം, നന്മ, തിന്മ തുടങ്ങിയവ ഉണ്ടാക്കാനും സാധിക്കും. അതുപോലെ ശരീരങ്ങളിൽ വേദനയും രോഗവും ഉണ്ടാക്കാനും അതിന് സാധിക്കും. എന്നാൽ ഒരു ജഡവസ്തുവിനെ ജീവനുള്ള ഒന്നാക്കി മാറ്റാനോ തിരിച്ചോ മാറ്റാൻ സിഹ്റിലൂടെ സാധിക്കുമെന്ന വാദം സ്വീകാര്യമല്ല.
اَللّٰهُمَّ صَلِّ عَلَى سَيِّدِنٰا مُحَمَّدٍ وَعَلَى آلِهِ وَصَحْبِهِ وَسَلِّمْ