ജുഹൈന ഗോത്രത്തിൽപ്പെട്ട ഒരു സ്ത്രീ നബിﷺയുടെ അടുക്കൽ വന്ന് വ്യഭിചാരം ചെയ്തതായി ഏറ്റുപറഞ്ഞു. അവർ പറഞ്ഞു: ”ഞാൻ ഗർഭിണിയാണ്.” അപ്പോൾ നബിﷺ അവരുടെ രക്ഷാധികാരിയെ വിളിച്ചു വരുത്തിയിട്ട് പറഞ്ഞു: ”അവളോട് നന്നായി പെരുമാറുക. അവൾ പ്രസവിച്ചു കഴിഞ്ഞാൽ എന്നെ വിവരമറിയിക്കുക.” അങ്ങനെ അദ്ദേഹം അത് ചെയ്തു. അപ്പോൾ നബിﷺ അവളോട് കൽപ്പിക്കുകയും, അവളുടെ വസ്ത്രങ്ങൾ നന്നായി കെട്ടിയുറപ്പിക്കുകയും ചെയ്തു. ശേഷം, അവളെ എറിഞ്ഞുകൊല്ലാൻ അഥവാ റജ്മ് നടപ്പിലാക്കാൻ കൽപ്പിക്കുകയും, അങ്ങനെ അവളെ എറിഞ്ഞു കൊല്ലുകയും ചെയ്തു.
ശേഷം, നബിﷺ അവർക്കുവേണ്ടി മയ്യത്ത് നിസ്കാരം നിർവഹിച്ചു. അപ്പോൾ ഉമറുബ്നുൽ ഖത്വാബ്(റ) ചോദിച്ചു: ”അല്ലാഹുവിൻ്റെ റസൂലേﷺ, അങ്ങ് അവളെ എറിഞ്ഞുകൊന്നു. എന്നിട്ടും അങ്ങ് അവൾക്കുവേണ്ടി നിസ്കരിക്കുകയോ?” അപ്പോൾ തിരുനബിﷺ പറഞ്ഞു: ”അവൾ പശ്ചാത്തപിച്ചത്, മദീനയിലെ എഴുപത് ആളുകൾക്കിടയിൽ വിഭജിച്ചു നൽകിയാൽ പോലും അവർക്കെല്ലാം അത് മതിയാകുമായിരുന്നു. സ്വന്തം ശരീരത്തെ അല്ലാഹുവിനായി സമർപ്പിച്ചതിനേക്കാൾ അഥവാ വ്യഭിചാരത്തിനുള്ള ശിക്ഷ ഏറ്റുവാങ്ങിയതിനേക്കാൾ ശ്രേഷ്ഠമായ മറ്റെന്തെങ്കിലും പശ്ചാത്താപം നിങ്ങൾ കണ്ടിട്ടുണ്ടോ?”
ഈ ഹദീസിൽ ഉമറുബ്നുൽ ഹുസൈൻ(റ) റിപ്പോർട്ട് ചെയ്യുന്നത് ഇപ്രകാരമാണ്. അറബ് ലോകത്ത് അറിയപ്പെട്ട ജുഹൈന ഗോത്രക്കാരിയായ ഒരു സ്ത്രീ തിരുനബിﷺയുടെ അടുക്കൽ വന്ന് താൻ വ്യഭിചാരം ചെയ്തുവെന്നും ആ ദുഷ്പ്രവൃത്തിയിൽ ഗർഭിണിയാണെന്നും ഏറ്റുപറഞ്ഞു. ആ സ്ത്രീ മുമ്പ് വിവാഹം കഴിച്ചവളുമായിരുന്നു. വിവാഹിതനായ വ്യക്തിയെ കല്ലെറിഞ്ഞു കൊല്ലാനുള്ള ശിക്ഷയാണ് റജ്മ്, അതായത് മരണം വരെ കല്ലുകൊണ്ട് എറിയുക.
അതിനാൽ, പ്രവാചകൻﷺ ആ സ്ത്രീയുടെ വലിയ്യ് അഥവാ രക്ഷകർത്താവിനോട് കുട്ടി പ്രസവിക്കുകയും ഗർഭത്തിൽ നിന്ന് മോചനം നേടുകയും ചെയ്യുന്നതുവരെ അവളോട് നന്നായി പെരുമാറാൻ നിർദ്ദേശിച്ചു. മുസ്ലിമി(റ)ൽ ഉദ്ധരിച്ചതുപോലുള്ള മറ്റു ചില റിപ്പോർട്ടുകളിൽ, കുഞ്ഞിന് മുലയൂട്ടുന്നത് വരെ തിരുനബിﷺ അവളെ വിട്ടുകൊടുത്തു എന്ന് കാണാം. പ്രവാചകൻﷺ അവളുടെ സംരക്ഷകനോട് നന്നായി പെരുമാറാൻ ആവശ്യപ്പെട്ടത്, അവളെ അവളുടെ ബന്ധുക്കളിൽ നിന്നുള്ള ദേഷ്യം, അപകീർത്തി, ഭയം, അതുവഴി അവർ ഉപദ്രവിക്കാനുള്ള സാധ്യത എന്നിവ കാരണമായിരിക്കണം .അതോടൊപ്പം, ഇതുപോലുള്ള സ്ത്രീകളോടുള്ള ആളുകളുടെ വെറുപ്പും വിഷമം നിറഞ്ഞ സംസാരവും മറ്റും ഒഴിവാക്കാനും വേണ്ടിയാണ് തിരുനബിﷺ അങ്ങനെ നിർദ്ദേശിച്ചത്.
പിന്നീട് പ്രവാചകൻﷺ അവളോട് അവളുടെ വസ്ത്രങ്ങൾ കെട്ടി ഭദ്രമാക്കാൻ ഉത്തരവിട്ടു. അതായത്, അവളുടെ രഹസ്യഭാഗങ്ങൾ മറയത്തക്കവിധം വസ്ത്രങ്ങൾ ഒന്നിച്ചു ചേർത്തു കെട്ടിച്ചു. എന്നിട്ട് അവളെ കല്ലെറിഞ്ഞു കൊന്നു. അതിനുശേഷം പ്രവാചകൻﷺ സ്വഹാബികളോട് അവളുടെ മേൽ നിസ്കരിക്കാൻ ആവശ്യപ്പെട്ടു. അപ്പോൾ ഉമർ(റ) ചോദിച്ചു: “അല്ലാഹുവിന്റെ ദൂതരേﷺ, അവൾ വ്യഭിചാരം ചെയ്തിരിക്കെ ഞങ്ങൾ അവൾക്ക് വേണ്ടി നിസ്കരിക്കുകയോ?” അപ്പോൾ പ്രവാചകൻﷺ അവൾക്ക് വേണ്ടി സാക്ഷ്യം വഹിച്ചു. അല്ലാഹുവിനെ സാക്ഷിയാക്കി തിരുനബിﷺ പറഞ്ഞു: “ഈ സ്ത്രീ പശ്ചാത്തപിച്ചിരിക്കുന്നു. ആ പശ്ചാത്താപം മദീനയിലെ എഴുപത് പേർക്കിടയിൽ വിഭജിച്ചു കൊടുത്താൽ അത് അവർക്ക് മതിയാകും.” കാരണം, അവളുടെ പശ്ചാത്താപം സത്യസന്ധമായിരുന്നു, അത് ഒരു വലിയ സ്ഥാനത്തേക്ക് അവളെ എത്തിച്ചു. അവളുടെ വ്യഭിചാരത്തിനുള്ള ശിക്ഷ കല്ലേറുമരണത്തിലൂടെയുള്ള പാപമോചനമാണെന്ന് അവൾക്കറിയാമായിരുന്നു. എന്നിട്ടും, ആ പ്രത്യേക പശ്ചാത്താപത്തിൽ ആശ്രയിച്ച് സ്വന്തം ആത്മാവിനെ ശുദ്ധീകരിക്കാനും ശിക്ഷ നടപ്പിലാക്കാനും അവൾ വാശിപിടിച്ചു. കാരണം, പ്രസവത്തിനു മുലയൂട്ടാനും എന്നിങ്ങനെ പലതവണയും അവളെ മടക്കി വിട്ടപ്പോഴും ഓരോ ഘട്ടവും കഴിഞ്ഞ് അവൾ ശിക്ഷ വാങ്ങാൻ വേണ്ടി മനസ്സറിഞ്ഞ് മടങ്ങിവന്നു.
اَللّٰهُمَّ صَلِّ عَلَى سَيِّدِنٰا مُحَمَّدٍ وَعَلَى آلِهِ وَصَحْبِهِ وَسَلِّمْ