ത്വൽഹ ബിൻ അബ്ദുള്ള അൽ-ബസ്രി(റ) റിപ്പോർട്ട് ചെയ്യുന്നു, തിരുനബിﷺ പറഞ്ഞു: “നിങ്ങൾ ഒരു കാലത്തെ അഭിമുഖീകരിക്കും. അന്ന് ആളുകൾ കഅ്ബയുടെ വിരികൾക്ക് സമാനമായ വസ്ത്രങ്ങൾ ധരിക്കും. രാവിലെയും വൈകുന്നേരവും വലിയ ഭക്ഷണപാത്രങ്ങൾ അവർക്ക് മുന്നിലെത്തും അഥവാ അത്രമേൽ ആഡംബരം വർധിക്കും.”
ഇബ്നു ഉമർ(റ) റിപ്പോർട്ട് ചെയ്യുന്നു, തിരുനബി ﷺ പറഞ്ഞു: “എന്റെ ഉമ്മത്ത് അഹങ്കാരത്തോടെ നടക്കുകയും, പേർഷ്യയിലെയും റോമിലെയും രാജകുമാരന്മാർ അവരെ സേവിക്കുകയും ചെയ്യുമ്പോൾ, അല്ലാഹു അവരുടെ ശക്തി അവർക്കിടയിൽ തന്നെ പോരാടാൻ വിട്ടുകൊടുക്കും. അവരിലെ ദുഷ്ടന്മാരെ നല്ലവരുടെ മേൽ അവൻ അധികാരികളാക്കും.”
തിരുനബിﷺ പറഞ്ഞു: “ഹീറ പട്ടണം നായയുടെ പല്ലുകൾ പോലെ എനിക്ക് വെളിപ്പെട്ടു കിട്ടിയിരിക്കുന്നു അഥവാ അതിന്റെ കോട്ടകൾ അത്രമേൽ വ്യക്തമായി കാണാം. നിങ്ങളത് തീർച്ചയായും കീഴടക്കും.” ഇത് കേട്ടപ്പോൾ ഒരാൾ എഴുന്നേറ്റു പറഞ്ഞു: “അല്ലാഹുവിന്റെ ദൂതരെﷺ, എനിക്ക് അവിടുത്തെ ഭരണാധികാരിയുടെ മകളായ നഫീലയുടെ മകളെ നൽകിയാലും.” തിരുനബിﷺ പറഞ്ഞു: “അവൾ നിനക്കുള്ളതാണ്.” പിന്നീട് ഹീറ കീഴടക്കപ്പെട്ടപ്പോൾ പ്രവാചകൻﷺ പറഞ്ഞതുപോലെ അവൾ ആ വ്യക്തിക്ക് നൽകപ്പെട്ടു. അപ്പോൾ അവളുടെ പിതാവ് അല്ലെങ്കിൽ സഹോദരൻ വന്ന് ചോദിച്ചു: “നീ ഇവളെ വിൽക്കുമോ?” അയാൾ പറഞ്ഞു: “അതെ.” എത്ര തുക വേണമെന്ന് ചോദിച്ചപ്പോൾ അയാൾ പറഞ്ഞു: “നിങ്ങൾക്ക് ഇഷ്ടമുള്ളത് നിശ്ചയിച്ചോളൂ.” അവർ ആയിരം ദിർഹം വാഗ്ദാനം ചെയ്തു. അത് വാങ്ങി അവരെ വിട്ടയച്ച ശേഷം മറ്റൊരാൾ ആ വ്യക്തിയോട് ചോദിച്ചു: “നീ മുപ്പതിനായിരം എന്ന് പറഞ്ഞിരുന്നെങ്കിൽ പോലും അവർ നൽകുമായിരുന്നല്ലോ?” അപ്പോൾ അയാൾ തിരിച്ചു ചോദിച്ചു: “ആയിരത്തിന് മുകളിൽ മറ്റൊരു സംഖ്യയുണ്ടോ?” അക്കാലത്ത് വലിയ സംഖ്യയായി ആയിരത്തെയാണ് അദ്ദേഹം കരുതിയിരുന്നത്.
ഇമാം ത്വബ്റാനി(റ)യും ബൈഹഖി(റ)യും അബൂ നുഐമും(റ) ഖുറൈം ബിൻ ഔസ്(റ)വിൽ നിന്ന് റിപ്പോർട്ട് ചെയ്യുന്നു: ഞാൻ തബൂഖ് യുദ്ധം കഴിഞ്ഞ് മടങ്ങിവരുന്ന തിരുനബിﷺയുടെ അടുത്തേക്ക് ഹിജ്റ വന്നു. അപ്പോൾ അവിടുന്ന് പറഞ്ഞു: “ഇതാ, വെള്ളനിറത്തിലുള്ള ഹീറ പട്ടണം എനിക്ക് ഉയർത്തി കാണിക്കപ്പെട്ടിരിക്കുന്നു. ഇതാ, അസ്ദ് ഗോത്രക്കാരിയായ നഫീലയുടെ മകൾ ശഹ്ബാഅ്, ഒരു കറുത്ത ശിരോവസ്ത്രം ധരിച്ച് വെളുത്ത കോവർകഴുതപ്പുറത്ത് വരുന്നത് ഞാൻ കാണുന്നു.”
ഞാൻ പറഞ്ഞു: “അല്ലാഹുവിന്റെ റസൂലേﷺ, ഞങ്ങൾ ഹീറയിൽ പ്രവേശിക്കുമ്പോൾ അങ്ങ് പറഞ്ഞതുപോലെ അവളെ കണ്ടാൽ അവൾ എനിക്കുള്ളതാകുമോ?” തിരുനബിﷺ പറഞ്ഞു: “അവൾ നിനക്കുള്ളതാണ്.”
പിന്നീട് അബൂബക്കർ സിദ്ദീഖ്(റ)വിന്റെ കാലത്ത് മുസൈലിമത്തുൽ കദ്ദാബുമായുള്ള യുദ്ധം കഴിഞ്ഞ് ഞങ്ങൾ ഹീറയിലേക്ക് തിരിച്ചു. ഞങ്ങൾ അവിടെ പ്രവേശിച്ചപ്പോൾ ആദ്യം കണ്ടത് നഫീലയുടെ മകളെയായിരുന്നു. തിരുനബിﷺ വിശേഷിപ്പിച്ചതുപോലെ തന്നെ അവൾ കറുത്ത ശിരോവസ്ത്രമണിഞ്ഞ് വെളുത്ത കോവർകഴുതപ്പുറത്ത് വരികയായിരുന്നു. ഞാൻ അവളെ പിടിച്ചുവെച്ചു. ഞാൻ പറഞ്ഞു: “ഇവളെ അല്ലാഹുവിന്റെ റസൂൽﷺ എനിക്ക് ദാനം നൽകിയതാണ്.” ഖാലിദ് ബിൻ വലീദ്(റ) ഇതിന് തെളിവ് ആവശ്യപ്പെട്ടു. മുഹമ്മദ് ബിൻ മസ്ലമ(റ)യും മുഹമ്മദ് ബിൻ ബിശ്റും(റ) സാക്ഷി പറഞ്ഞു. തുടർന്ന് അവളെ എനിക്ക് വിട്ടുതന്നു.
അപ്പോൾ അവളുടെ സഹോദരൻ സന്ധി ചർച്ചകൾക്കായി വന്നു, എന്നോട് ചോദിച്ചു: “നീ ഇവളെ എനിക്ക് വിൽക്കുമോ?”
ഞാൻ പറഞ്ഞു: “അല്ലാഹുവാണെ സത്യം! പത്ത് നൂറ് (1000) ദിർഹത്തിൽ കുറഞ്ഞ ഒന്നിനും ഞാൻ സമ്മതിക്കില്ല.” അദ്ദേഹം ആയിരം ദിർഹം എനിക്ക് നൽകി. അപ്പോൾ ആരോ എന്നോട് ചോദിച്ചു: “നീ ഒരു ലക്ഷം ചോദിച്ചിരുന്നെങ്കിൽ പോലും അദ്ദേഹം നൽകില്ലായിരുന്നോ?” ഞാൻ പറഞ്ഞു: “പത്ത് നൂറിനേക്കാൾ അഥവാ ആയിരത്തേക്കാൾ വലിയൊരു സംഖ്യയുണ്ടെന്ന് ഞാൻ കരുതിയിരുന്നില്ല.”
ലളിതമായി പറഞ്ഞാൽ, തിരുനബിﷺ വർഷങ്ങൾക്ക് മുമ്പ് കൃത്യമായി പ്രവചിച്ച കാര്യങ്ങൾ അക്ഷരംപ്രതി സംഭവിക്കുകയും, അന്ന് കൂടെയുണ്ടായിരുന്നവർക്ക് അത് നേരിൽ കാണാൻ സാധിക്കുകയും ചെയ്തു.
اَللّٰهُمَّ صَلِّ عَلَى سَيِّدِنٰا مُحَمَّدٍ وَعَلَى آلِهِ وَصَحْبِهِ وَسَلِّمْ