യമൻ, സിറിയ, ഇറാഖ് എന്നിവയുടെ വിജയത്തെക്കുറിച്ചുള്ള തിരുനബിﷺയുടെ പ്രവചനങ്ങൾ ചില നിവേദനങ്ങളിലൂടെ വായിക്കാം.
ഇമാം ഇബ്നു അസാക്കിർ(റ) അബ്ദുറഹ്മാൻ ബിൻ ജുബൈറി(റ)ൽ നിന്ന്, അദ്ദേഹം തന്റെ പിതാവിൽ നിന്ന്, അദ്ദേഹം തിരുനബിﷺയുടെ അനുചരന്മാരിൽ ഒരാളിൽ നിന്ന് നിവേദനം ചെയ്യുന്നു: അല്ലാഹുവിന്റെ ദൂതർﷺ പറഞ്ഞു: “നിങ്ങൾക്കായി സിറിയ കീഴടക്കപ്പെടും. അപ്പോൾ നിങ്ങൾ ദമസ്കസ് എന്ന നഗരം മുറുകെ പിടിക്കുക. കാരണം അത് ശാമിലെ നഗരങ്ങളിൽ വെച്ച് ഏറ്റവും ഉത്തമമായതാണ്. വൻ യുദ്ധങ്ങൾ നടക്കുമ്പോൾ മുസ്ലീംകളുടെ അഭയസ്ഥാനമാണത്. അതിലെ ‘ഗൂത’ എന്നറിയപ്പെടുന്ന സ്ഥലത്തായിരിക്കും മുസ്ലീംകളുടെ താവളം. ദജ്ജാലിൽ നിന്നുള്ള അവരുടെ അഭയസ്ഥാനം ബൈത്തുൽ മുഖദ്ദസും, യഅ്ജൂജ് മഅ്ജൂജിൽ നിന്നുള്ള അഭയസ്ഥാനം തൂർ പർവ്വതവുമാണ്.”
ത്വബറാനി(റ)യും ഇബ്നു അസാക്കിറും(റ) മുഹമ്മദ് ബിൻ അബ്ദുറഹ്മാനി(റ)ൽ നിന്ന് നിവേദനം ചെയ്യുന്നു: തിരുനബിﷺ പറഞ്ഞു: “അറിഞ്ഞുകൊള്ളുക! ശാമും ബൈത്തുൽ മുഖദ്ദസും തീർച്ചയായും അല്ലാഹു ഉദ്ദേശിച്ചാൽ നിങ്ങൾക്ക് കീഴടക്കപ്പെടും. അല്ലാഹു ഉദ്ദേശിച്ചാൽ നീയും നിനക്ക് ശേഷം നിന്റെ മക്കളും അവിടെ നേതാക്കളായിരിക്കും.”
ബുഖാരി(റ), മുസ്ലിം(റ), ഇമാം മാലിക്(റ) എന്നിവർ സുഫ്യാൻ ബിൻ അബീ സുഹൈറി(റ)ൽ നിന്ന് നിവേദനം ചെയ്യുന്നു: തിരുനബിﷺ പറഞ്ഞു: “യമൻ കീഴടക്കപ്പെടും. അപ്പോൾ കുറച്ചു ആളുകൾ വരികയും നാട് വിടാൻ പ്രേരിപ്പിക്കുകയും അവർ തങ്ങളുടെ കുടുംബങ്ങളെയും അവരെ അനുസരിക്കുന്നവരെയും കൂട്ടി അങ്ങോട്ട് പുറപ്പെടുകയും ചെയ്യും. അവർ അറിയുന്നവരാണെങ്കിൽ മദീനയാണ് അവർക്ക് ഉത്തമം. ശാം കീഴടക്കപ്പെടും, അപ്പോഴും കുറച്ചുപേർ വരികയും തങ്ങളുടെ കുടുംബങ്ങളെയും അനുസരിക്കുന്നവരെയും കൂട്ടി അങ്ങോട്ട് പുറപ്പെടുകയും ചെയ്യും. അവർ അറിയുന്നവരാണെങ്കിൽ മദീനയാണ് അവർക്ക് ഉത്തമം. ഇറാഖ് കീഴടക്കപ്പെടും, അപ്പോഴും കുറച്ചുപേർ തങ്ങളുടെ കുടുംബങ്ങളെയും കൂട്ടി അങ്ങോട്ട് പുറപ്പെടും. അവർ അറിയുന്നവരാണെങ്കിൽ മദീനയാണ് അവർക്ക് ഉത്തമം.”
ഇമാം അഹ്മദ്(റ) മുആദ് ബിൻ ജബലി(റ)ൽ നിന്ന് നിവേദനം ചെയ്യുന്നു: തിരുനബിﷺ പറഞ്ഞു: “നിങ്ങൾ ശാമിലേക്ക് പലായനം ചെയ്യും. അത് നിങ്ങൾക്കായി കീഴടക്കപ്പെടും. അവിടെ നിങ്ങൾക്ക് കുരു അല്ലെങ്കിൽ പരു പോലുള്ള ഒരു രോഗം പിടിപെടും. അത് പുരുഷന്റെ മർമ്മങ്ങളെ ബാധിക്കും. അതിലൂടെ അല്ലാഹു അവർക്ക് രക്തസാക്ഷിത്വം നൽകുകയും അവരുടെ പ്രവൃത്തികളെ ശുദ്ധീകരിക്കുകയും ചെയ്യും.”
ഇമാം ത്വബറാനി(റ) വാസില ബിൻ അസ്ഖഇ(റ)ൽ നിന്ന് നിവേദനം ചെയ്യുന്നു: അല്ലാഹുവിന്റെ ദൂതർﷺ പറഞ്ഞു: “ജനതകൾ വിവിധ സൈന്യങ്ങളായി തിരിക്കപ്പെടും; ഒരു സൈന്യം യമനിലും, ഒന്ന് ശാമിലും, ഒന്ന് കിഴക്കും, ഒന്ന് പടിഞ്ഞാറും. നിങ്ങൾ ശാമിനെ മുറുകെ പിടിക്കുക. കാരണം അത് അല്ലാഹുവിന്റെ ഭൂമിയിൽ അവന് ഏറ്റവും ഇഷ്ടപ്പെട്ട ഇടമാണ്. തന്റെ അടിമകളിൽ നിന്ന് തിരഞ്ഞെടുത്തവരെ അവൻ അങ്ങോട്ടേക്ക് നയിക്കും. നിങ്ങൾ ശാമിനെ മുറുകെ പിടിക്കുക, കാരണം ശാമിനും അവിടുത്തെ ജനങ്ങൾക്കും അല്ലാഹു ഉത്തരവാദിത്തം ഏറ്റെടുത്തിരിക്കുന്നു. അത് നിരസിക്കുന്നവർ യമനിലേക്ക് പോകട്ടെ.”
اَللّٰهُمَّ صَلِّ عَلَى سَيِّدِنٰا مُحَمَّدٍ وَعَلَى آلِهِ وَصَحْبِهِ وَسَلِّمْ