ഇമാം അഹ്മദ്(റ), നസാഈ(റ), ദാരിമി(റ), ഹാകിം(റ) എന്നിവർ അബൂ സലമ ബിൻ നുഫൈൽ അസ്സുകൂനി(റ)വിൽ നിന്ന് നിവേദനം ചെയ്യുന്നു. മുസ്തദ്റക്കി(റ)ന്റെ സംഗ്രഹത്തിൽ ഇമാം ദഹബി(റ) ഇതിനെ ‘സ്വഹീഹായ ഹദീസുകളിലെ അത്ഭുതകരമായ ഒന്ന്’ എന്ന് വിശേഷിപ്പിച്ചിട്ടുണ്ട്. അദ്ദേഹം പറയുന്നു: ഞങ്ങൾ തിരുനബിﷺയുടെ അടുത്തിരിക്കുകയായിരുന്നു. അപ്പോൾ ഒരാൾ ചോദിച്ചു: “അല്ലാഹുവിന്റെ ദൂതരെﷺ, അവിടുത്തേക്ക് ആകാശത്തുനിന്ന്, മറ്റൊരു നിവേദനത്തിൽ: സ്വർഗത്തിൽ നിന്ന് ഭക്ഷണം നൽകപ്പെട്ടിട്ടുണ്ടോ?” അവിടുന്ന് പറഞ്ഞു: “അതെ.” അദ്ദേഹം ചോദിച്ചു: “ഏത് തരത്തിലുള്ള ഭക്ഷണമാണത്?” അവിടുന്ന് മറുപടി നൽകി: “മസഖന അഥവാ ചൂടുള്ള ഒരു തരം ഭക്ഷണം.”
അവർ ചോദിച്ചു: “അങ്ങേയ്ക്ക് കഴിച്ചതിന് ശേഷം അതിൽ ബാക്കിയുണ്ടായിരുന്നോ?”
അവിടുന്ന് പറഞ്ഞു: “അതെ.” അവർ ചോദിച്ചു: “പിന്നീട് അത് എന്ത് ചെയ്തു?” അവിടുന്ന് പറഞ്ഞു: “അത് ആകാശത്തേക്ക് തന്നെ ഉയർത്തപ്പെട്ടു.”
ഇബ്നു അസാകിർ(റ) അബൂ സഈദ്(റ) എന്ന വ്യക്തിയിൽ നിന്ന് നിവേദനം ചെയ്യുന്നു. അദ്ദേഹം പറഞ്ഞു: ഞാൻ മദീനയിൽ വന്നപ്പോൾ ഒരാൾ തന്റെ കൂട്ടുകാരനോട് ഇപ്രകാരം പറയുന്നത് കേട്ടു: “തിരുനബിﷺക്ക് ഇന്നലെ രാത്രി ഒരു സൽക്കാര ഭക്ഷണം ലഭിച്ചു.” ഞാൻ തിരുനബിﷺയുടെ അടുത്ത് ചെന്ന് ചോദിച്ചു: “അല്ലാഹുവിന്റെ റസൂലേﷺ, അങ്ങേയ്ക്ക് ഇന്നലെ രാത്രി ഭക്ഷണം നൽകപ്പെട്ടതായി ഞാൻ അറിഞ്ഞു.” അവിടുന്ന് പറഞ്ഞു: “അതെ.” ഞാൻ ചോദിച്ചു: “അതെന്തായിരുന്നു?”
അവിടുന്ന് പറഞ്ഞു: “ചൂടുള്ള ഒരു തരം ഭക്ഷണമായിരുന്നു.” ഞാൻ ചോദിച്ചു: “അതിലെ ബാക്കി വന്ന ഭക്ഷണത്തിന് എന്ത് സംഭവിച്ചു?”
അവിടുന്ന് പറഞ്ഞു: “അത് ഉയർത്തപ്പെട്ടു.”
ഇമാം അഹ്മദ്(റ), നസാഈ(റ), തിർമിദി(റ), ഇബ്നു ഹിബ്ബാൻ(റ), ഹാകിം(റ), ബൈഹഖി(റ) തുടങ്ങിയവർ നിവേദനം ചെയ്തതും, ദഹബി(റ) സ്ഥിരീകരിച്ചതുമായ സമുറത്ത് ബിൻ ജുൻദുബ്(റ)വിൽ നിന്നുള്ള ഹദീസിൽ ഇപ്രകാരം പറയുന്നു: തിരുനബിﷺക്ക് ഇറച്ചിയും റൊട്ടിയും ചേർത്ത വിഭവം സരീദ് അടങ്ങിയ ഒരു വലിയ പാത്രം നൽകപ്പെട്ടു. അവിടുന്ന് അത് കഴിച്ചു, കൂടെയുള്ളവരും കഴിച്ചു. ഏകദേശം ഉച്ചവരെ ആളുകൾ മാറി മാറി വന്നുകൊണ്ടിരുന്നു. ഒരു വിഭാഗം കഴിച്ച് എഴുന്നേൽക്കുമ്പോൾ അടുത്ത വിഭാഗം വന്ന് കഴിക്കും. അപ്പോൾ ഒരാൾ ചോദിച്ചു: “ആ പാത്രത്തിൽ ഭക്ഷണം നിറച്ചുകൊടുക്കുന്നുണ്ടായിരുന്നോ?” അവിടുന്ന് പറഞ്ഞു: “ഭൂമിയിൽ നിന്നല്ല, എന്നാൽ ആകാശത്തുനിന്ന് അത് നിറച്ചുകൊടുക്കപ്പെടുന്നുണ്ടായിരുന്നു.”
ബുഖാരി(റ), മുസ്ലിം(റ), തിർമിദി(റ), അബു ശൈഖ്(റ), ഇബ്നു മർദവൈഹി(റ) എന്നിവർ ഇബ്നു മസ്ഊദ്(റ)വിൽ നിന്ന് നിവേദനം ചെയ്യുന്നു: “തിരുനബിﷺക്കൊപ്പം ഭക്ഷണം കഴിക്കാറുണ്ടായിരുന്നു. അപ്പോൾ ആ ഭക്ഷണം കഴിക്കപ്പെടുമ്പോൾ അതിൽ നിന്നുള്ള തസ്ബീഹ് ധ്വനികൾ ഞങ്ങൾ കേൾക്കാറുണ്ടായിരുന്നു.”
അനസ്(റ)വിൽ നിന്ന് അബൂ ശൈഖ്(റ) നിവേദനം ചെയ്യുന്നു: ഒരിക്കൽ തിരുനബിﷺക്ക് ‘സരീദ്’ കൊണ്ടുവരപ്പെട്ടു. അപ്പോൾ അവിടുന്ന് പറഞ്ഞു:
“തീർച്ചയായും ഈ ഭക്ഷണം തസ്ബീഹ് ചൊല്ലുന്നുണ്ട്.” അവർ ചോദിച്ചു: “അല്ലാഹുവിന്റെ ദൂതരെﷺ, അങ്ങ് അതിന്റെ തസ്ബീഹ് ഗ്രഹിക്കുന്നുണ്ടോ?”
അവിടുന്ന് പറഞ്ഞു: “അതെ.” തുടർന്ന് അവിടുന്ന് ഒരാളോട് പറഞ്ഞു: “ഈ പാത്രം ആ വ്യക്തിയുടെ അടുത്തേക്ക് നീക്കി വെക്കുക.” അദ്ദേഹം അത് നീക്കി വെച്ചപ്പോൾ ആ വ്യക്തി പറഞ്ഞു: “അതെ അല്ലാഹുവിന്റെ ദൂതരെﷺ, ഈ ഭക്ഷണം തസ്ബീഹ് ചൊല്ലുന്നുണ്ട്.” മറ്റൊരാളുടെ അടുത്തേക്ക് നീക്കി വെക്കാൻ അവിടുന്ന് ആവശ്യപ്പെട്ടു. അദ്ദേഹവും പറഞ്ഞു: “ഈ ഭക്ഷണം തസ്ബീഹ് ചൊല്ലുന്നു.” അവിടുന്ന് പറഞ്ഞു: “അത് തിരികെ വെക്കുക.” അപ്പോൾ ഒരാൾ ചോദിച്ചു: “അല്ലാഹുവിന്റെ റസൂലേﷺ, അങ്ങ് ഇത് എല്ലാ ആളുകൾക്കും നൽകാൻ കൽപ്പിച്ചിരുന്നെങ്കിൽ എല്ലാവർക്കും അത് കേൾക്കാമായിരുന്നല്ലോ?”
അവിടുന്ന് മറുപടി നൽകി: “വേണ്ട, ഏതെങ്കിലും ഒരാളുടെ അടുത്തെത്തുമ്പോൾ അത് നിശബ്ദമായാൽ, അയാൾ ചെയ്ത പാപം കാരണമാണ് അത് സംഭവിച്ചതെന്ന് മറ്റുള്ളവർ പറഞ്ഞേക്കാം.” അങ്ങനെ അത് തിരികെ വെക്കപ്പെട്ടു.
ഖൈസമ(റ)വിൽ നിന്ന് അബൂ ശൈഖ്(റ) നിവേദനം ചെയ്യുന്നു: അബുദ്ദർദാഅ്(റ) ഒരിക്കൽ ഒരു പാത്രത്തിൽ ഭക്ഷണം പാകം ചെയ്യുകയായിരുന്നു. ആ പാത്രം മറിഞ്ഞുവീഴുകയും അത് തസ്ബീഹ് ചൊല്ലാൻ തുടങ്ങുകയും ചെയ്തു. ഖൈസ്(റ)വിൽ നിന്ന് ബൈഹഖി(റ)യും അബൂ നുഐമും(റ) നിവേദനം ചെയ്യുന്നു:
അബുദ്ദർദാഅ്(റ)വും സൽമാൻ(റ)വും ഒരു പാത്രത്തിൽ നിന്ന് ഭക്ഷണം കഴിച്ചുകൊണ്ടിരിക്കെ, ആ പാത്രവും അതിലുള്ള ഭക്ഷണവും തസ്ബീഹ് ചൊല്ലുകയുണ്ടായി. നസാഈ(റ)യും ഇബ്നു മർദവൈഹി(റ)യും ഇബ്നു മസ്ഊദ്(റ)വിൽ നിന്ന് നിവേദനം ചെയ്യുന്നു:
തിരുനബിﷺ വെള്ളം കുടിക്കുമ്പോൾ, ആ വെള്ളത്തിന്റെ ശബ്ദവും അത് തസ്ബീഹ് ചൊല്ലുന്നതും ഞങ്ങൾ കേൾക്കാറുണ്ടായിരുന്നു.”
اَللّٰهُمَّ صَلِّ عَلَى سَيِّدِنٰا مُحَمَّدٍ وَعَلَى آلِهِ وَصَحْبِهِ وَسَلِّمْ