തിരുനബിﷺയുടെ അര മുണ്ടിനെ കുറിച്ചുള്ള വർത്തമാനമാണ് നാം വായിക്കുന്നത്. പ്രമുഖ സ്വഹാബി ഇക്’രിമ(റ) പറയുന്നു. മഹാനായ ഇബ്നു അബ്ബാസി((റ)ന്റെ ഉടുമുണ്ട് ഞാൻ ശ്രദ്ധിച്ചു. അതിന്റെ താഴെയറ്റം പാദത്തിന്റെ മേൽ സ്പർശിക്കുന്നു. അരയിൽ പിൻഭാഗത്ത് തുണിയുടെ രണ്ട് തലകളും ചേർത്ത് കെട്ടിയിട്ടുമുണ്ട്. ഞാൻ ചോദിച്ചു. നിങ്ങൾ എന്താണ് ഇങ്ങനെ തുണി ഉടുക്കുന്നത്? തിരുനബിﷺ ഇപ്രകാരമാണ് അരമുണ്ട് ഉടുത്തിരുന്നത്. ഇബ്നു അബ്ബാസ്(റ) മറുപടി പറഞ്ഞു.
ഉമ്മുൽ ഹുസൈൻ അൽ അഹ്മസിയ്യ(റ) എന്ന സ്വഹാബിയിൽ നിന്ന് അബൂബക്കർ ബിൻ ഖൈസമ(റ) നിവേദനം ചെയ്യുന്നു. വിടവാങ്ങൽ ഹജ്ജ് വേളയിൽ ഒരു പുതപ്പുകൊണ്ട് തിരുനബിﷺ ശരീരം മറച്ചതായി ഞാൻ കണ്ടു. അവിടുത്തെ കക്ഷത്തിന്റെ താഴത്തുകൂടി ചുറ്റിയായിരുന്നു ശരീരം മൂടിയിരുന്നത്.
തിരുനബിﷺയുടെ അരയുടുപ്പ് മുട്ടിനും നെരിയാണിക്കും ഇടയിൽ വരെ ഉണ്ടായിരുന്നു എന്ന് ഉമർ(റ) പറയുന്ന നിവേദനം ഇമാം നസാഇ(റ) ഉദ്ധരിക്കുന്നുണ്ട്.
തിരുനബിﷺ ഒരൊറ്റ വസ്ത്രത്തിൽ ചുറ്റി ശരീരം മറച്ചുകൊണ്ട് ഞങ്ങൾക്ക് ഇമാമായി നിസ്കരിക്കാൻ നിന്നു എന്ന് അബൂഹുറൈറ(റ) പറയുന്ന അനുഭവം ഇമാം ത്വബ്റാനി(റ) ഉദ്ധരിക്കുന്നുണ്ട്. ആ വസ്ത്രത്തിന്റെ അഗ്രങ്ങൾ കൃത്യമായി ചേർത്തുകെട്ടാൻ സാധിക്കുമായിരുന്നില്ല.
ഉമ്മുൽ ഫള്ൽ ബിൻത് ഹാരിസ്(റ) നിവേദനം ചെയ്യുന്ന ഹദീസിലും തിരുനബിﷺ ഒരു ചേല ചുറ്റി അതിൽ നിസ്കരിച്ച രംഗം പറയുന്നുണ്ട്.
പ്രിയ പത്നി ആഇശ(റ) പറയുന്നു. തിരുനബിﷺ ആരെയും ആക്ഷേപിക്കുമായിരുന്നില്ല. അവിടുത്തേക്ക് വേണ്ടി ആരും വസ്ത്രം മടക്കി കൊടുക്കാറുമുണ്ടായിരുന്നില്ല.
തിരുനബിﷺയുടെ വസ്ത്രധാരണം എങ്ങനെയായിരുന്നു എന്നതിൽ വിശ്വാസികൾക്കും നബിﷺയെ അനുഗമിക്കുന്നവർക്കും ഒരുപാട് മാതൃകകൾ ഉണ്ട്. ലളിതമായ വസ്ത്രധാരണമായിരുന്നു അവിടുന്ന് സ്വീകരിച്ചത്. പുരുഷന്മാർ പട്ടുവസ്ത്രം ധരിക്കരുതെന്നും അത് നിഷിദ്ധമാണെന്നും അവിടുന്ന് പഠിപ്പിച്ചു. ഏതു വസ്ത്രം ധരിക്കുമ്പോഴും അല്ലാഹു തന്ന അനുഗ്രഹത്തെക്കുറിച്ചുള്ള വിചാരം ഉണ്ടാകണം. ഏതുകാലത്തും ഉടുവസ്ത്രത്തിന് മറുവസ്ത്രം ഇല്ലാത്ത എത്രയോ ആളുകളുണ്ടാകും. നഗ്നത മറക്കാൻ മാത്രം വസ്ത്രം ലഭിക്കുന്നു എന്നത് വലിയ അനുഗ്രഹമായിട്ടാണ് പ്രവാചകൻﷺ പരിചയപ്പെടുത്തിയത്. വസ്ത്രധാരണത്തിന്റെ പേരിൽപോലും അഹംഭാവം ഉണ്ടാകരുതെന്നും അത് അല്ലാഹുവിനെ മറക്കുന്ന വിചാരങ്ങളിലേക്ക് എത്തിക്കുമെന്നും പ്രവാചകൻﷺ ഉൽബോധിപ്പിച്ചു. അഹംഭാവത്തോടെയും ആഢ്യത്വം പ്രകടിപ്പിച്ചും നെരിയാണിക്ക് താഴെ വസ്ത്രം വലിച്ചിഴക്കുന്നത് തിരുനബിﷺ വിലക്കിയിട്ടുണ്ട്.
അല്ലാഹുവിനെയും അവന്റെ അനുഗ്രഹങ്ങളെയും മറക്കുന്ന ഏതുവിധം മാനസിക വിചാരങ്ങളെയും തിരുനബിﷺ നിരുത്സാഹപ്പെടുത്തി. നല്ല വസ്ത്രവും പുതുവസ്ത്രവും ശുഭ്ര വസ്ത്രവുമൊക്കെ ധരിക്കാൻ പ്രേരിപ്പിക്കുമ്പോഴും ഒന്നിലും അമിതവ്യയം പാടില്ല എന്ന് നിർദ്ദേശിച്ചു. എവിടെയും അല്ലാഹുവിനെ മറക്കുന്ന വിധം ഞാൻ എന്ന വിചാരം കടന്നുവരരുത് എന്ന് നിഷ്കർഷിച്ചു. മെച്ചപ്പെട്ട വസ്ത്രം ധരിക്കുന്നതിൽ വല്ല അപാകതയും ഉണ്ടോ എന്ന് അനുചരന്മാർ തിരുനബിﷺയോട് ചോദിച്ചു. അതിൽ അമിതവ്യയമോ അല്ലാഹുവിനോടുള്ള അനിഷ്ടമോ ഉണ്ടാകുമോ എന്നായിരുന്നു ചോദ്യത്തിന്റെ താല്പര്യം. പ്രവാചകൻﷺ ഇങ്ങനെ വിശദീകരിച്ചു.
അല്ലാഹു സൗന്ദര്യമാണ് അവൻ സൗന്ദര്യത്തെ ഇഷ്ടപ്പെടുന്നു. മെച്ചപ്പെട്ട വസ്ത്രമോ ഉടയടകളോ ഉപയോഗിക്കുന്നതിൽ പരാതിയില്ല. വിലക്കപ്പെട്ടതോ അല്ലാഹുവിനെ മറക്കുന്നതോ ആകാൻ പാടില്ല എന്നതാണ് താല്പര്യം. ഒരു മേഖലയിലും ധൂർത്ത് കടന്നു വരരുത് എന്ന കണിശതയും നബിﷺ ഉദ്ബോധിപ്പിച്ചു. തിരുനബിﷺയുടെ വസ്ത്രധാരണങ്ങൾ പരിചയപ്പെടുത്തിയപ്പോൾ അക്കാലത്തെ സാമൂഹിക സാമ്പത്തിക അവസ്ഥ കൂടി അതിൽ ഉൾച്ചേർന്നിട്ടുണ്ട്. അഥവാ നബിﷺയും അനുചരന്മാരും ജീവിച്ച കാലത്തിന്റെ ഒരു നേർക്കാഴ്ച.