പേർഷ്യ, റോം എന്നിവയുടെ വിജയത്തെക്കുറിച്ചും ഇന്ത്യയെ പരാമർശിച്ചും തിരുനബിﷺ നൽകിയ പ്രവചനങ്ങൾ താഴെ നൽകുന്നു:
ഇമാം നസാഈ(റ)യും ത്വബ്റാനി(റ)യും മികച്ച പരമ്പരയോടെ തിരുനബിﷺയുടെ സേവകനായ സൗബാനി(റ)ൽ നിന്ന് നിവേദനം ചെയ്യുന്നു. തിരുനബിﷺ പറഞ്ഞു: “എന്റെ സമുദായത്തിലെ രണ്ട് വിഭാഗങ്ങളെ അല്ലാഹു നരകത്തിൽ നിന്ന് സംരക്ഷിച്ചിരിക്കുന്നു: ഇന്ത്യയിൽ അതിജയം നേടുന്ന ഒരു വിഭാഗവും, ഈസാ ഇബ്നു മറിയം(അ)മിനോടൊപ്പം ഉണ്ടാകുന്ന ഒരു വിഭാഗവും.”
അബ്ദുല്ലഹിബ്നു ബുസ്ർ(റ) നിവേദനം ചെയ്യുന്നു, തിരുനബിﷺ പറഞ്ഞു. “എന്റെ ആത്മാവ് ആരുടെ കയ്യിലാണോ അവനെത്തന്നെ സത്യം! പേർഷ്യയും റോമും നിങ്ങൾക്കായി കീഴടക്കപ്പെടുക തന്നെ ചെയ്യും. നിങ്ങളുടെ മേൽ ഐശ്വര്യം ചൊരിയപ്പെടും. നിങ്ങൾക്ക് റൊട്ടിയും ഇറച്ചിയും സുലഭമാകും; അത്രത്തോളം അധികമായിരിക്കുമെന്നതിനാൽ അവയിൽ പലതിലും അല്ലാഹുവിന്റെ നാമം പോലും ഉച്ചരിക്കപ്പെടുകയില്ല.”
സഅദ് ബിൻ അബീ വഖാസ്(റ), അബ്ദുല്ലഹിബ്നു ബുസ്ർ(റ) എന്നിവരിൽ നിന്ന് നിവേദനം: തിരുനബിﷺ പറയുന്നത് ഞാൻ കേട്ടു:
“മുസ്ലിംകൾ റോമിന് മേൽ വിജയം കൈവരിക്കും, പേർഷ്യയ്ക്ക് മേൽ വിജയം കൈവരിക്കും, അറേബ്യൻ ഉപദ്വീപിന് മേൽ വിജയം കൈവരിക്കും.”
അബൂ മുഹൈരീസി(റ)ൽ നിന്ന് നിവേദനം: തിരുനബിﷺ പറഞ്ഞു: “പേർഷ്യ ഒരു ആടിനെപ്പോലെ ഒന്നോ രണ്ടോ തവണ കുത്തും, അതിന് ശേഷം പിന്നീട് ഒരിക്കലും ഒരു പേർഷ്യ ഉണ്ടാവില്ല. എന്നാൽ റോം കൊമ്പുകളുള്ളവരാണ് (അതായത് വീണ്ടും വീണ്ടും ശക്തി പ്രാപിക്കുന്നവർ). ഓരോ കൊമ്പും(തലമുറ) നശിക്കുമ്പോൾ മറ്റൊരു കൊമ്പ് പകരം വരും. അവർ പാറയുടെയും കടലിന്റെയും ആൾക്കാരാണ്. കാലത്തിന്റെ അവസാനം വരെ അവർ നിങ്ങളുടെ ശത്രുക്കളായിരിക്കും; ജീവിതത്തിൽ നന്മയുള്ള കാലത്തോളം അവർ നിങ്ങളുടെ കൂടെയുണ്ടാകും.”
അബ്ദുല്ലഹിബ്നു അംറ്(റ) നിവേദനം ചെയ്യുന്നു:
തിരുനബിﷺ ചോദിച്ചു: “പേർഷ്യയിലെയും റോമിലെയും ഖജനാവുകൾ നിങ്ങൾക്ക് തുറന്നു തന്നാൽ അന്ന് നിങ്ങൾ ഏത് അവസ്ഥയിലായിരിക്കും?” അബ്ദുറഹ്മാൻ ബിൻ ഔഫ്(റ) പറഞ്ഞു: “അല്ലാഹു കൽപ്പിച്ചത് പോലെ ഞങ്ങൾ പ്രവർത്തിക്കും.” തിരുനബിﷺ പറഞ്ഞു: “അല്ലെങ്കിൽ നിങ്ങൾ ഇങ്ങനെയാകാനാണ് സാധ്യത: നിങ്ങൾ പരസ്പരം മത്സരിക്കും, പിന്നീട് പരസ്പരം അസൂയപ്പെടും, പിന്നീട് പരസ്പരം പിന്തിരിഞ്ഞു നിൽക്കും, ശേഷം പരസ്പരം വിദ്വേഷിക്കും. അതിനുശേഷം നിങ്ങൾ മുഹാജിറുകളുടെ വാസസ്ഥലങ്ങളിലേക്ക് പോവുകയും പരസ്പരം കഴുത്തറുക്കുന്ന അവസ്ഥയിലാവുകയും ചെയ്യും.”
സ്വഫ്വാൻ ബിൻ അംറ്(റ) നിവേദനം ചെയ്യുന്നു: തിരുനബിﷺ പറഞ്ഞു: “അല്ലാഹു എനിക്ക് പേർഷ്യയെയും റോമിനെയും വാഗ്ദാനം ചെയ്തിട്ടുണ്ട്. അവരുടെ സ്ത്രീകളെയും മക്കളെയും ആയുധങ്ങളെയും നിധികളെയും അവൻ എനിക്ക് നൽകി. ഹിംയർ ഗോത്രക്കാരെ സഹായികളായി നൽകി എനിക്ക് അവൻ ശക്തി പകർന്നു.”
ഹാശിം ബിൻ ഉത്ബ(റ) നിവേദനം ചെയ്യുന്നു, തിരുനബിﷺ പറഞ്ഞു: “മുസ്ലിംകൾ അറേബ്യൻ ഉപദ്വീപിലും, പേർഷ്യയിലും, റോമിലും വിജയം നേടും. ഒടുവിൽ അവർ ഒറ്റക്കണ്ണനായ ദജ്ജാലിന് മേലും വിജയം കൈവരിക്കും.
അബ്ദുല്ലഹിബ്നു സഅദ് അൽ അൻസാരി(റ) നിവേദനം ചെയ്യുന്നു, തിരുനബിﷺ പറഞ്ഞു:
“അല്ലാഹു എനിക്ക് രണ്ട് ഖജനാവുകൾ നൽകിയിട്ടുണ്ട്: പേർഷ്യയിലെയും റോമിലെയും ഖജനാവുകൾ.” മറ്റൊരു നിവേദനത്തിൽ ഇപ്രകാരം പറയുന്നു: “അല്ലാഹു എനിക്ക് ഹിംയറിലെ രാജാക്കന്മാരെ സഹായികളായി നൽകി. അവർ വരുന്നത് അല്ലാഹുവിന്റെ സമ്പത്ത് എടുത്തു കൊണ്ടായിരിക്കും, അവർ അല്ലാഹുവിന്റെ മാർഗ്ഗത്തിൽ പോരാടുകയും ചെയ്യും.”