ഹൂദ് നബി(അ)നു നൽകപ്പെട്ട അത്ഭുതങ്ങൾക്ക് സമാനമായി തിരുനബിﷺക്ക് ലഭിച്ചത് ഇങ്ങനെ വായിക്കാം.
അബൂ നുഐം(റ) പറഞ്ഞു: ഹൂദ് നബി(അ)ക്ക് കാറ്റിലൂടെയുള്ള വിജയം നൽകപ്പെട്ടു. നമ്മുടെ നബിﷺക്ക് ബദ്ർ യുദ്ധത്തിലും ഖന്ദഖിലും അതുവഴി വിജയം നൽകപ്പെട്ടിട്ടുണ്ട്.
സ്വാലിഹ് നബി(അ)യെ സംബന്ധിച്ച വായനയിൽ ഇങ്ങനെ കാണാം. അബൂ നുഐം(റ) പറഞ്ഞു: അദ്ദേഹത്തിന് ഒട്ടകം നൽകപ്പെട്ടു. അതിന്റെ ഉദാഹരണമാണ് നമ്മുടെ നബിﷺക്ക് ലഭിച്ച ഒട്ടകത്തിന്റെ സംസാരവും, മുൻപ് കഴിഞ്ഞതുപോലെ അത് പ്രവാചകനെﷺ അനുസരിച്ചതും.
അല്ലാഹുവിൻ്റെ സവിശേഷമായ പ്രിയം ലഭിച്ച ഇബ്രാഹിം നബി(അ)യുടെ ജീവിതത്തിൽ നിന്ന് വായിക്കുമ്പോൾ ഇപ്രകാരം നമുക്ക് നിരീക്ഷിക്കാം. അദ്ദേഹത്തിന് തീയിൽ നിന്നുള്ള രക്ഷ ലഭിച്ചു. നമ്മുടെ തിരുനബിﷺക്ക് വേണ്ടി പേർഷ്യൻ തീ അണഞ്ഞുപോയിട്ടുണ്ട്. അബൂ നുഐം(റ) ഉബ്ബാദ് ബിൻ അബ്ദുസ്സമദി(റ)ൽ നിന്ന് നിവേദനം ചെയ്യുന്നു: അദ്ദേഹം പറഞ്ഞു: ഞങ്ങൾ അനസ് ബിൻ മാലിക്(റ)ന്റെ അടുത്തേക്ക് ചെന്നു. അദ്ദേഹം പറഞ്ഞു: ഹേ ദാസീ, ഉച്ചഭക്ഷണം കഴിക്കാൻ വിരിപ്പ് കൊണ്ടുവരൂ. അങ്ങനെ അവർ അത് കൊണ്ടുവന്നു. പിന്നീട് അദ്ദേഹം പറഞ്ഞു: തൂവാല കൊണ്ടുവരൂ. അങ്ങനെ അവൾ ഒരു അഴുക്കുള്ള തൂവാല കൊണ്ടുവന്നു. അപ്പോൾ അദ്ദേഹം പറഞ്ഞു: അടുപ്പ് കത്തിക്കൂ. അവൾ അത് കത്തിച്ചു. അപ്പോൾ അദ്ദേഹം ആ തൂവാല എടുത്ത് അതിലേക്ക് എറിയാൻ കൽപിച്ചു. അത് പാൽ പോലെ വെളുത്തതായി പുറത്തുവന്നു. അപ്പോൾ ഞങ്ങൾ ചോദിച്ചു: എന്താണിത്? അദ്ദേഹം പറഞ്ഞു: ഇത് തിരുനബിﷺ അവിടുത്തെ തിരുമുഖം തുടക്കാറുണ്ടായിരുന്ന ഒരു തൂവാലയാണ്. അത് അഴുക്കായാൽ ഞങ്ങൾ ഇങ്ങനെ ചെയ്യും; കാരണം, പ്രവാചകന്മാരുടെ മുഖത്ത് സ്പർശിച്ച ഒന്നിനെയും തീ തിന്നുകയില്ല. അദ്ദേഹത്തിന്റെ സമുദായത്തിൽ പെട്ട ഒന്നിലധികം പേരെ തീയിലിട്ടു, എന്നാൽ അത് അവരെ ബാധിച്ചില്ല. അവരിൽ പെട്ടവരാണ്: ദുഅൈബ് ബിൻ കുലൈബ് ബിൻ റബീഅ അൽ ഖൗലാനി(റ).
ഇബ്‌നു വഹ്ബ്(റ), ഇബ്‌നു ലഹീഅ(റ)യിൽ നിന്ന് നിവേദനം ചെയ്യുന്നു: അസ്‌വദ് അൽ അൻസി പ്രവാചകത്വം വാദിക്കുകയും സൻആ പിടിച്ചെടുക്കുകയും ചെയ്തപ്പോൾ, ദുഅൈബ് ബിൻ കുലൈബി(റ)നെ പിടികൂടി പ്രവാചകനിﷺലുള്ള അദ്ദേഹത്തിന്റെ വിശ്വാസം കാരണം തീയിലിട്ടു. എന്നാൽ തീ അദ്ദേഹത്തെ ഉപദ്രവിച്ചില്ല. തിരുനബിﷺ അവിടുത്തെ അനുചരന്മാരോട് ഇക്കാര്യം പറഞ്ഞു. അപ്പോൾ ഉമർ(റ) പറഞ്ഞു: ഖലീലായ ഇബ്രാഹിമി(അ)നെപ്പോലെ നമ്മുടെ സമുദായത്തിലും ഒരാളെ നൽകിയ അല്ലാഹുവിന് സർവ്വ സ്തുതിയും.
ഇബ്‌നു അസാകിർ(റ), ഇസ്മാഈൽ ബിൻ അയ്യാശ്(റ) വഴി ശുറഹ്ബീൽ ബിൻ മുസ്ലിം അൽ ഖൗലാനി(റ)യിൽ നിന്ന് നിവേദനം ചെയ്യുന്നു: അസ്‌വദ് പ്രവാചകത്വം വാദിച്ചു. അങ്ങനെ അവൻ അബൂ മുസ്ലിം അൽ ഖൗലാനി(റ)യുടെ അടുത്തേക്ക് ആളെ അയച്ചു. അദ്ദേഹം വന്നു. അപ്പോൾ അവൻ ചോദിച്ചു: ഞാൻ അല്ലാഹുവിന്റെ ദൂതനാണെന്ന് നീ സാക്ഷ്യം വഹിക്കുന്നുവോ? അദ്ദേഹം പറഞ്ഞു: ഞാൻ കേൾക്കുന്നില്ല. അവൻ ചോദിച്ചു: മുഹമ്മദ്ﷺ അല്ലാഹുവിന്റെ ദൂതനാണെന്ന് നീ സാക്ഷ്യം വഹിക്കുന്നുവോ? അദ്ദേഹം പറഞ്ഞു: അതെ. അങ്ങനെ അവൻ ഒരു വലിയ തീ കൊണ്ടുവന്നു. പിന്നീട് അബൂ മുസ്ലിമി(റ)നെ അതിലിട്ടു. എന്നാൽ തീ അദ്ദേഹത്തെ ഉപദ്രവിച്ചില്ല. അപ്പോൾ അസ്‌വദിനോട് പറയപ്പെട്ടു: ഇത് നീ നിന്നിൽ നിന്ന് നീക്കം ചെയ്തില്ലെങ്കിൽ നിന്നെ പിന്തുടർന്നവരെല്ലാം നിനക്കെതിരെ പാഴായിപ്പോകും.
അങ്ങനെ അവൻ അദ്ദേഹത്തോട് യാത്ര തിരിക്കാൻ കൽപിച്ചു. അദ്ദേഹം മദീനയിൽ എത്തിയപ്പോഴേക്കും തിരുനബിﷺ വഫാത്താവുകയും അബൂബക്കർ(റ) ഖലീഫയാക്കപ്പെടുകയും ചെയ്തിരുന്നു. അപ്പോൾ അബൂബക്കർ(റ) പറഞ്ഞു: ഇബ്രാഹിം ഖലീലി(അ)ന് ചെയ്തതുപോലെ മുഹമ്മദ് നബിﷺയുടെ സമുദായത്തിൽ ആരോട് പ്രവർത്തിക്കപ്പെട്ടുവോ അവനെ കാണുന്നത് വരെ എന്നെ ജീവിപ്പിച്ചു നിർത്തിയ അല്ലാഹുവിന് സർവ്വ സ്തുതിയും. അവരിൽ പെട്ടയാളാണ് അമ്മാർ ബിൻ യാസിറും(റ).
اَللّٰهُمَّ صَلِّ عَلَى سَيِّدِنٰا مُحَمَّدٍ وَعَلَى آلِهِ وَصَحْبِهِ وَسَلِّمْ