ഇമാം ബുഖാരി(റ)യും മുസ്ലിമും(റ) അബൂഹുറൈറ(റ)വിൽ നിന്ന് നിവേദനം ചെയ്യുന്നു: തിരുനബിﷺ പറഞ്ഞു: “ഹിജാസിന്റെ മണ്ണിൽ നിന്ന് ഒരു തീ ഉയർന്നുവരുകയും, അത് ബുസ്രയിലെ ഒട്ടകങ്ങളുടെ കഴുത്തുകളെ പ്രകാശിപ്പിക്കുകയും ചെയ്യുന്നതുവരെ അന്ത്യനാൾ സംഭവിക്കുകയില്ല.”
ബുഖാരി(റ)യും ഇബ്നു മാജ(റ)യും അബൂഹുറൈറ(റ)വിൽ നിന്ന് നിവേദനം ചെയ്യുന്നു: തിരുനബിﷺ പറഞ്ഞു: “ജ്ഞാനം പിൻവലിക്കപ്പെടുകയും, ഭൂകമ്പങ്ങൾ വർദ്ധിക്കുകയും, കാലം ചുരുങ്ങുകയും, കുഴപ്പങ്ങൾ വെളിവാകുകയും, ഹർജ് —അതായത് കൊലപാതകം— വർദ്ധിക്കുകയും, നിങ്ങൾക്കിടയിൽ ധനം കവിഞ്ഞൊഴുകുമാറ് പെരുകുകയും ചെയ്യുന്നതുവരെ അന്ത്യനാൾ സംഭവിക്കുകയില്ല.”
ബുഖാരി(റ)യും മുസ്ലിമും(റ) അബൂഹുറൈറ(റ)വിൽ നിന്ന് നിവേദനം ചെയ്യുന്നു: തിരുനബിﷺ പറഞ്ഞു: “നിങ്ങൾക്കിടയിൽ ധനം പെരുകി കവിഞ്ഞൊഴുകുന്നതുവരെ അന്ത്യനാൾ സംഭവിക്കുകയില്ല; ഏതെന്നാൽ ധനികൻ തന്റെ ദാനം സ്വീകരിക്കുന്ന ആരെങ്കിലും ഉണ്ടോ എന്ന് അന്വേഷിച്ച് വിഷമിക്കും. അത് ഒരാൾക്ക് നൽകാൻ നീട്ടുമ്പോൾ ‘എനിക്കതിന്റെ ആവശ്യമില്ല’ എന്ന് അവൻ മറുപടി പറയും.”
ഇമാം ഇബ്നു അബിദ്ദുൻയാ(റ), ത്വബ്റാനി(റ) എന്നിവർ അബൂ മൂസ(റ)വിൽ നിന്ന് ഉദ്ധരിക്കുന്നു: തിരുനബിﷺ പറഞ്ഞു: “അല്ലാഹുവിന്റെ ഗ്രന്ഥത്തെ നിന്ദ്യമായി കരുതുകയും, ഇസ്ലാം അപരിചിതമായിത്തീരുകയും, ജനങ്ങൾക്കിടയിൽ പരസ്പര വിദ്വേഷം വെളിപ്പെടുകയും, ഇൽമ് പിൻവലിക്കപ്പെടുകയും, കാലം ദ്രവിച്ചുപോകുകയും മനുഷ്യരുടെ ആയുസ്സ് കുറയുകയും, വർഷങ്ങളും ഫലവൃക്ഷങ്ങളുടെ വിളവും കുറയുകയും, വഞ്ചകർ വിശ്വസിക്കപ്പെടുകയും വിശ്വസ്തർ വഞ്ചകരായി ചിത്രീകരിക്കപ്പെടുകയും, കള്ളം പറയുന്നവൻ സത്യവാനാക്കപ്പെടുകയും സത്യവാൻ വ്യാജനാക്കപ്പെടുകയും, കൊലപാതകം പെരുകുകയും, ഉയരമുള്ള മാളികകൾ നിർമ്മിച്ച് അഹങ്കരിക്കുകയും, മക്കളുള്ളവർ ദുഃഖിതരാവുകയും വന്ധ്യരായവർ സന്തോഷിക്കുകയും, അതിക്രമവും അസൂയയും പിശുക്കും വെളിപ്പെടുകയും, ജനങ്ങൾ നശിക്കുകയും, സ്വാർത്ഥ താല്പര്യങ്ങളെ പിന്തുടരുകയും, ഊഹാപോഹങ്ങൾ വെച്ച് വിധി കൽപ്പിക്കുകയും, മഴ വർദ്ധിക്കുകയും എന്നാൽ ഫലങ്ങൾ കുറയുകയും, അറിവ് തീർത്തും വറ്റിപ്പോവുകയും അജ്ഞത കവിഞ്ഞൊഴുകുകയും, കുട്ടി കോപത്തിന് കാരണമാവുകയും ശൈത്യകാലം കടുത്ത ചൂടുള്ളതാവുകയും, നിന്ദ്യമായ കാര്യങ്ങൾ പരസ്യമായി ചെയ്യപ്പെടുകയും, ഭൂമി ചുരുക്കപ്പെടുകയും, പ്രസംഗകർ കള്ളം പറയുകയും എന്റെ സമുദായത്തിലെ ഏറ്റവും മോശപ്പെട്ടവർക്കായി എന്റെ അവകാശങ്ങളെ വച്ചുമാറുകയും ചെയ്യുന്നതുവരെ അന്ത്യനാൾ സംഭവിക്കുകയില്ല. അതിനാൽ ആരെങ്കിലും അവരെ സത്യപ്പെടുത്തുകയും അതിൽ തൃപ്തിയടയുകയും ചെയ്താൽ അവൻ സ്വർഗ്ഗത്തിന്റെ സുഗന്ധം പോലും ശ്വസിക്കുകയില്ല.”
ഇമാം ഹാകിം(റ) ഇബ്നു ഉമർ(റ) വഴി ഹുദൈഫ(റ)വിൽ നിന്ന് നിവേദനം ചെയ്യുന്നു: തിരുനബിﷺ പറഞ്ഞു: “അസ്ബഹാനിലെ യഹൂദികളിൽ നിന്ന് ദജ്ജാൽ പുറത്തുവരുന്നതുവരെ അന്ത്യനാൾ സംഭവിക്കുകയില്ല. അവന്റെ വലതുകണ്ണ് കാഴ്ചയില്ലാത്തതും മറ്റേ കണ്ണ് സൂര്യനെ തുളച്ചുനോക്കുന്ന നക്ഷത്രം പോലെയുമായിരിക്കും. അവൻ വായുവിൽ വെച്ച് പക്ഷികളെ പിടികൂടും. കിഴക്കുള്ളവർക്കും പടിഞ്ഞാറുള്ളവർക്കും കേൾക്കാവുന്ന തരത്തിൽ അവൻ മൂന്ന് അലർച്ചകൾ അലറും. അവന്റെ കൂടെ പുകയും തീയും ഉള്ള ഒരു മലയും, മരങ്ങളും പുഴകളും ഉള്ള മറ്റൊരു മലയും ഉണ്ടായിരിക്കും. അവൻ പറയും: ‘ഇതാണ് സ്വർഗ്ഗം, ഇതാണ് നരകം’.”
اَللّٰهُمَّ صَلِّ عَلَى سَيِّدِنٰا مُحَمَّدٍ وَعَلَى آلِهِ وَصَحْبِهِ وَسَلِّمْ