തിരുനബിﷺ പറഞ്ഞു: “തീർച്ചയായും അവരുടെ പേരുകളും അവരുടെ പിതാക്കളുടെ പേരുകളും അവരുടെ കുതിരകളുടെ നിറങ്ങളും എനിക്കറിയാം. അന്നേദിവസം ഭൂമുഖത്തുള്ള ഏറ്റവും ഉത്തമരായ കുതിരപ്പടയാളികളാണവർ” അല്ലെങ്കിൽ പറഞ്ഞു: “ഭൂമുഖത്തുള്ളവരിൽ വെച്ച് ഏറ്റവും ഉത്തമരാണവർ.”
ഇബ്‌നു അബീ ശൈബ(റ), ഇബ്‌നു മനീഅ്(റ), ഇമാം അഹ്മദ്(റ), ഹാകിം(റ) എന്നിവർ അബൂ ഖബീലി(റ)ൽ നിന്ന് നിവേദനം ചെയ്യുന്നു: ഞങ്ങൾ അംറ് ബിൻ ആസി(റ)ന്റെ അടുത്തിരിക്കുമ്പോൾ അദ്ദേഹത്തോട് ചോദിക്കപ്പെട്ടു: “കോൺസ്റ്റാന്റിനോപ്പിൾ, റോം എന്നീ രണ്ട് നഗരങ്ങളിൽ ഏതാണ് ആദ്യം കീഴടക്കപ്പെടുക?” അപ്പോൾ അബ്ദുല്ല(റ) തന്റെ വളയങ്ങളുള്ളയൊരു പെട്ടി കൊണ്ടുവരാൻ ആവശ്യപ്പെട്ടു. അതിൽ നിന്ന് ഒരു ഗ്രന്ഥം പുറത്തെടുത്ത് വായിച്ചു: പറഞ്ഞു: ഞങ്ങൾ തിരുനബിﷺയുടെ ചുറ്റുമിരിക്കുമ്പോൾ അവിടുത്തോട് ചോദിക്കപ്പെട്ടു: “കോൺസ്റ്റാന്റിനോപ്പിൾ, റോം എന്നീ നഗരങ്ങളിൽ ഏതാണ് ആദ്യം കീഴടക്കപ്പെടുക?” അപ്പോൾ തിരുനബിﷺപറഞ്ഞു: “അല്ല, ഹിറഖ്‌ലിന്റെ നഗരമാണ് /കോൺസ്റ്റാന്റിനോപ്പിൾ ആണ് ആദ്യം കീഴടക്കപ്പെടുക.”
ഇമാം ഇബ്‌നു മാജ(റ) കസീർ ബിൻ അബ്ദില്ലാഹി ബിൻ അംറ് ബിൻ ഔഫി(റ)ൽ നിന്ന്, അദ്ദേഹം തന്റെ പിതാവിൽ നിന്ന്, അദ്ദേഹം തന്റെ പിതാമഹനിൽ നിന്ന് നിവേദനം ചെയ്യുന്നു: തിരുനബിﷺ പറഞ്ഞു. “മുസ്‌ലിംകളുടെ ഏറ്റവും അടുത്ത കാവൽപ്പുരകൾ ‘ബൗലാഅ്’ എന്ന സ്ഥലത്താകുന്നത് വരെ അന്ത്യനാൾ സംഭവിക്കുകയില്ല. ഹേ അലീ(റ), തീർച്ചയായും നിങ്ങൾ ബനൂ അസ്ഫറിനോട് അഥവാ റോമാക്കാരോട് യുദ്ധം ചെയ്യും. നിങ്ങൾക്ക് ശേഷം വരുന്നവരും അവരോട് യുദ്ധം ചെയ്യും. ഒടുവിൽ ഇസ്‌ലാമിന്റെ ഏറ്റവും ഉത്തമരായ ആളുകൾ, അല്ലാഹുവിന്റെ മാർഗ്ഗത്തിൽ ഒരു ആക്ഷേപകന്റെയും ആക്ഷേപത്തെ ഭയപ്പെടാത്ത ഹിജാസിലെ ജനങ്ങൾ, അവർക്കെതിരെ പുറപ്പെടും. അവർ തസ്ബീഹും തക്ബീറും ചൊല്ലിക്കൊണ്ട് കോൺസ്റ്റാന്റിനോപ്പിൾ കീഴടക്കും. മുൻപൊരിക്കലും ലഭിച്ചിട്ടില്ലാത്ത അത്രയും വലിയ യുദ്ധമുതലുകൾ അവർക്ക് ലഭിക്കും, എത്രത്തോളമെന്നാൽ അവർ തങ്ങളുടെ പരിചകൾ കൊണ്ട് അത് അളന്ന് തിരിക്കും. അപ്പോൾ ഒരാൾ വന്ന് പറയും: ‘തീർച്ചയായും മസീഹ് ദജ്ജാൽ നിങ്ങളുടെ നാട്ടിൽ പുറപ്പെട്ടിരിക്കുന്നു.’ അറിയുക, അതൊരു അസത്യമായിരിക്കും. അത് കേട്ട് മടങ്ങിപ്പോകുന്നവനും ഖേദിക്കും, അവിടെ തുടരുന്നവനും ഖേദിക്കും.”
ഇമാം ദൈലമി(റ) അംറ് ബിൻ ഔഫിൽ(റ) നിന്ന് നിവേദനം ചെയ്യുന്നു, തിരുനബിﷺ പറഞ്ഞു: “തസ്ബീഹും തക്ബീറും കൊണ്ട് അല്ലാഹു സത്യവിശ്വാസികൾക്ക് കോൺസ്റ്റാന്റിനോപ്പിളും റോമും കീഴടക്കിക്കൊടുക്കുന്നത് വരെ അന്ത്യനാൾ സംഭവിക്കുകയില്ല.”
ഇമാം അഹ്മദ്(റ), ബുഖാരി(റ) അത്താരീഖിലും ബസ്സാർ(റ), ഇബ്‌നു ഖുസൈമ(റ), ബഗവി(റ), ബാരൂദി(റ), ഇബ്‌നുസ്സകൻ(റ), ഇബ്‌നു ഖാനിഅ്(റ), ത്വബറാനി(റ), അബൂ നുഐം(റ), ഹാകിം(റ), ളിയാഅ്(റ) എന്നിവർ അബ്ദുല്ലാഹി ബിൻ ബിശ്ർ അൽ-ഗനവി(റ)യിൽ നിന്ന്, അദ്ദേഹം തന്റെ പിതാവിൽ നിന്ന് നിവേദനം ചെയ്യുന്നു: തിരുനബിﷺ പറഞ്ഞു: “തീർച്ചയായും കോൺസ്റ്റാന്റിനോപ്പിൾ കീഴടക്കപ്പെടും. അത് കീഴടക്കുന്ന നേതാവ് എത്ര നല്ല അമീർ! ആ സൈന്യം എത്ര നല്ല സൈന്യം!”
اَللّٰهُمَّ صَلِّ عَلَى سَيِّدِنٰا مُحَمَّدٍ وَعَلَى آلِهِ وَصَحْبِهِ وَسَلِّمْ