ഉമ്മു വറഖ(റ)വിന് തിരുനബി ﷺ രക്തസാക്ഷിത്വം പ്രവചിച്ചത് ഇപ്രകാരം വായിക്കാം.
ഇമാം അബൂദാവൂദും(റ) അബൂ നുഐമും(റ) അബ്ദുറഹ്മാൻ ബിൻ ഖല്ലാദ് അൽ-അൻസാരി(റ)യിൽ നിന്ന്, ഉമ്മു വറഖ ബിൻത് നൗഫലി(റ)നെ ഉദ്ധരിച്ച് നിവേദനം ചെയ്യുന്നു: തിരുനബിﷺ ബദ്ർ യുദ്ധത്തിന് പുറപ്പെട്ടപ്പോൾ അവർ ചോദിച്ചു: “അല്ലാഹുവിന്റെ ദൂതരേﷺ, എനിക്കും അങ്ങയോടൊപ്പം യുദ്ധത്തിൽ പങ്കെടുക്കാൻ അനുവാദം നൽകിയാലും. അല്ലാഹു എനിക്ക് രക്തസാക്ഷിത്വം നൽകിയേക്കാം.” അപ്പോൾ തിരുനബിﷺ പറഞ്ഞു: “നീ നിന്റെ വീട്ടിൽ തന്നെ കഴിയുക, തീർച്ചയായും അല്ലാഹു നിനക്ക് രക്തസാക്ഷിത്വം നൽകുന്നതാണ്.” അങ്ങനെ അവർ ‘അശ്ശഹീദ’ /രക്തസാക്ഷി എന്ന് വിളിക്കപ്പെട്ടുപോന്നു. അവർ ഖുർആൻ നന്നായി പാരായണം ചെയ്യുന്ന ആളായിരുന്നു. പിന്നീട്, തനിക്ക് ശേഷമുള്ള മോചനപത്രം നൽകിയിരുന്ന തന്റെ ഒരു അടിമയും അടിമസ്ത്രീയും ചേർന്ന് രാത്രിയിൽ വന്ന്, ഒരു കമ്പിളി പുതപ്പ് കൊണ്ട് ശ്വാസം മുട്ടിച്ച് അവരെ കൊലപ്പെടുത്തി. ഇത് ഉമർ(റ)വിന്റെ ഭരണകാലത്തായിരുന്നു. ഉമർ(റ) അവരെ രണ്ടുപേരെയും പിടികൂടി ക്രൂശിക്കാൻ ഉത്തരവിട്ടു. മദീനയിൽ ആദ്യമായി ക്രൂശിക്കപ്പെട്ടത് ഇവരായിരുന്നു.
ഇബ്നു റാഹവൈഹി(റ), ഇബ്നു സഅ്ദ്(റ), ബൈഹഖി(റ), അബൂ നുഐം(റ) എന്നിവർ മറ്റൊരു വഴിയിലൂടെയും ഇത് നിവേദനം ചെയ്തിട്ടുണ്ട്. അതിന്റെ അവസാനത്തിൽ ഇങ്ങനെ കൂടിയുണ്ട്. ഉമർ(റ) പറഞ്ഞു: “അല്ലാഹുവിന്റെ ദൂതർﷺ പറഞ്ഞത് സത്യമാണ്.” അവിടുന്നു പറയാറുണ്ടായിരുന്നു: “വരൂ, നമുക്ക് ആ രക്തസാക്ഷിയെ /ഉമ്മു വറഖയെ സന്ദർശിക്കാം, അല്ലാഹു അവരോട് കരുണ കാണിക്കട്ടെ.”
അബ്ദുല്ലാഹിബ്നു ബുസ്ർ(റ) ഒരു നൂറ്റാണ്ട് ജീവിക്കുമെന്നും അദ്ദേഹത്തിന്റെ മുഖത്തെ മറുകിനെക്കുറിചും തിരുനബിﷺ മുന്നേ പറഞ്ഞുവെച്ചത് ഇങ്ങനെയാണ്. ഇമാം ത്വബ്റാനി(റ)യും ബަസ്സാറും(റ), അതുപോലെ ഹാരിസും(റ) ഇമാം അഹ്മദും(റ) സ്വഹീഹായ പരമ്പരയിലൂടെ അബ്ദുല്ലാഹിബ്നു ബുസ്ർ(റ)വിൽ നിന്ന് നിവേദനം ചെയ്യുന്നു. അദ്ദേഹം പറഞ്ഞു: തിരുനബിﷺ എന്റെ തലയിൽ കൈവെച്ചുകൊണ്ട് പറഞ്ഞു: “ഈ കുട്ടി ഒരു നൂറ്റാണ്ട് ജീവിക്കും.” അങ്ങനെ അദ്ദേഹം നൂറ് വർഷം ജീവിച്ചു. അദ്ദേഹത്തിന്റെ മുഖത്ത് ഒരു മറുക് അല്ലെങ്കിൽ അരിമ്പാറ ഉണ്ടായിരുന്നു. തിരുനബിﷺ പറഞ്ഞു: “മുഖത്തുനിന്നും ഈ മറുക് നീങ്ങുന്നത് വരെ അവൻ മരണപ്പെടുകയില്ല.” അങ്ങനെ മുഖത്തുനിന്നും ആ മറുക് അപ്രത്യക്ഷമാകുന്നതുവരെ അദ്ദേഹം മരണപ്പെട്ടില്ല.
വിശ്വസ്തരായ നിവേദകരിലൂടെ ഇമാം അഹ്മദും(റ) ത്വബ്റാനി(റ)യും ഹസൻ ബിൻ അയ്യൂബ് അൽ-ഹദ്റമി(റ)യിൽ നിന്ന് നിവേദനം ചെയ്യുന്നു, അദ്ദേഹം പറഞ്ഞു: അബ്ദുല്ലാഹിബ്നു ബുസ്ർ(റ) തന്റെ തലയിലെ ഒരു മറുക് എനിക്ക് കാണിച്ചുതന്നു. എന്നിട്ട് പറഞ്ഞു: അല്ലാഹുവിന്റെ ദൂതർﷺ അതിന്റെ മേൽ കൈവെച്ചുകൊണ്ട് പറഞ്ഞു: “ഇവൻ തീർച്ചയായും ഒരു നൂറ്റാണ്ട് ആയുസ്സ് ജീവിക്കും.”
സെയ്ദ് ബിൻ സൂഹാൻ(റ), ജുൻദുബ് ഇബ്നു കഅ്ബ്(റ) എന്നിവരുടെ അവസ്ഥയെക്കുറിച്ചുള്ള തിരുനബിﷺയുടെ പ്രവചനം ഇങ്ങനെയാണ്. അലി(റ)വിൽ നിന്ന് അബൂ യഅ്ലാ(റ) നിവേദനം ചെയ്യുന്നു, തിരുനബിﷺ പറഞ്ഞു: “തന്റെ ശരീരത്തിലെ ചില അവയവങ്ങൾ തനിക്ക് മുൻപേ സ്വർഗ്ഗത്തിൽ പ്രവേശിച്ച ഒരു മനുഷ്യനെ കണ്ട് സന്തോഷിക്കാൻ ആഗ്രഹിക്കുന്നവർ സെയ്ദ് ബിൻ സൂഹാനെ(റ) നോക്കിക്കൊള്ളട്ടെ.”
اَللّٰهُمَّ صَلِّ عَلَى سَيِّدِنٰا مُحَمَّدٍ وَعَلَى آلِهِ وَصَحْبِهِ وَسَلِّمْ