ജനങ്ങൾക്ക് തകർക്കാൻ കഴിയാതിരുന്ന പാറ തിരുനബിﷺ തങ്ങൾക്ക് മുന്നിൽ മൃദുവായ സംഭവം.
ജാബിർ ബിൻ അബ്ദില്ല(റ), അബ്ദുള്ള ബിൻ ഉമർ(റ), ബറാഅ് ബിൻ ആസിബ്(റ), അനസ്(റ) തുടങ്ങിയ പ്രമുഖ സ്വഹാബികളിൽ നിന്ന് ബുഖാരി(റ)യും അബൂ നുഐമും(റ) ബൈഹഖി(റ)യുമെല്ലാം ഈ സംഭവം റിപ്പോർട്ട് ചെയ്യുന്നു. അവർ പറയുന്നു: ഖന്ദഖ് യുദ്ധത്തിനായി കിടങ്ങ് കുഴിക്കുന്നതിനിടയിൽ അതിശക്തമായ ഒരു വലിയ പാറ ഞങ്ങളുടെ മുന്നിൽ പ്രത്യക്ഷപ്പെട്ടു. മഴുകൾ കൊണ്ടോ മറ്റ് പണിയായുധങ്ങൾ കൊണ്ടോ അത് തകർക്കാൻ സാധിച്ചില്ല. ഞങ്ങൾ ഈ വിവരം തിരുനബിﷺ തങ്ങളോട് പരാതിപ്പെട്ടു. അപ്പോൾ അവിടുന്ന് പറഞ്ഞു: “ഞാൻ അങ്ങോട്ട് ഇറങ്ങാം.”
അവിടുന്ന് ആ പാറ കണ്ടപ്പോൾ മഴു കൈയ്യിലെടുത്തു കൊണ്ട് “ബിസ്മില്ലാഹ്” അല്ലാഹുവിന്റെ നാമത്തിൽ എന്ന് ചൊല്ലി അതിനെ ഒരടി അടിച്ചു. ആ ഒരൊറ്റ അടിയിൽ പാറയുടെ മൂന്നിലൊരു ഭാഗം തകർന്നു. ആ സമയം നഗരത്തിന്റെ ഇരു അതിരുകൾക്കിടയിലുള്ള ഭാഗം മുഴുവൻ പ്രകാശിക്കത്തക്ക രീതിയിൽ ഒരു മിന്നൽ അവിടെ ഉണ്ടായി. കറുത്തിരുണ്ട രാത്രിയിൽ ഒരു വിളക്ക് തെളിച്ചത് പോലെ അതീവ ശോഭയുള്ളതായിരുന്നു ആ പ്രകാശം. അപ്പോൾ തിരുനബിﷺ തങ്ങൾ ഇപ്രകാരം പ്രഖ്യാപിച്ചു: “അല്ലാഹു അക്ബർ! എനിക്ക് പേർഷ്യയുടെ താക്കോലുകൾ നൽകപ്പെട്ടിരിക്കുന്നു. അല്ലാഹുവാണെ സത്യം! അവിടുത്തെ മദായിനിലെ ശ്വേത കൊട്ടാരം ഇവിടെയിരുന്ന് എനിക്ക് കാണാൻ സാധിക്കുന്നുണ്ട്.”
തുടർന്ന് അവിടുന്ന് രണ്ടാമതും അടിച്ചു. അതോടെ പാറയുടെ ബാക്കി ഭാഗവും തകർന്നു വീണു. അപ്പോഴും അവിടെ ശക്തമായ മിന്നൽ ഉണ്ടാവുകയും ഇരു ദിശകളിലും വെളിച്ചം പടരുകയും ചെയ്തു. അപ്പോൾ അവിടുന്ന് പറഞ്ഞു: “അല്ലാഹു അക്ബർ! എനിക്ക് യമനിന്റെ താക്കോലുകൾ നൽകപ്പെട്ടിരിക്കുന്നു. അല്ലാഹുവാണെ സത്യം! ഈ നിൽക്കുന്ന സ്ഥലത്ത് നിന്ന് എനിക്കിപ്പോൾ യമനിലെ സ്വൻആ നഗരം കാണാൻ കഴിയുന്നുണ്ട്.”
കല്ലുകൾ തിരുനബിﷺയോട് സലാം പറഞ്ഞതിനെക്കുറിച്ച് ജാബിർ ബിൻ സമുറ(റ) നിവേദനം ചെയ്തതായി ഇമാം മുസ്ലിമും(റ) ഇമാം അഹ്മദും(റ) രേഖപ്പെടുത്തുന്നു; തിരുനബിﷺ പറഞ്ഞു:
“പ്രവാചകത്വ ലബ്ധിക്ക് മുൻപ് എനിക്ക് സലാം പറഞ്ഞിരുന്ന ഒരു കല്ലിനെക്കുറിച്ച് എനിക്കറിയാം; തീർച്ചയായും എനിക്ക് ഇപ്പോഴും അതിനെ തിരിച്ചറിയാൻ സാധിക്കുന്നുണ്ട്.” അലി(റ) പ്രസ്താവിച്ചതായി ഇമാം തിർമിദി(റ) റിപ്പോർട്ട് ചെയ്യുന്നു:
“ഞാൻ മക്കയിൽ തിരുനബിﷺക്കൊപ്പം ഉണ്ടായിരുന്നു. ഞങ്ങൾ മക്കയുടെ പ്രാന്തപ്രദേശങ്ങളിലൂടെ പുറപ്പെട്ടപ്പോൾ, പ്രവാചകൻﷺ അഭിമുഖീകരിച്ച ഓരോ മലകളും മരങ്ങളും ‘അസ്സലാമു അലൈക്ക യാ റസൂലല്ലാഹ്’ അഥവാ അല്ലാഹുവിന്റെ ദൂതരേﷺ, അങ്ങേക്ക് സലാം ഉണ്ടാവട്ടെ എന്ന് പറയാതിരുന്നിട്ടില്ല.”
ജാബിർ ബിൻ സമുറ(റ) നിവേദനം ചെയ്തതായി അബൂ നുഐം(റ) റിപ്പോർട്ട് ചെയ്യുന്നു: “പ്രവാചകത്വം ലഭിച്ച നാളുകളിൽ, ഞാൻ ഏതൊരു മരത്തിനരികിലൂടെയോ കല്ലിനരികിലൂടെയോ നടന്നുപോയാലും അവ ‘അസ്സലാമു അലൈക്ക യാ റസൂലല്ലാഹ്’ എന്ന് പറയുമായിരുന്നു.”
ഇബ്നു അബ്ബാസ്(റ) നിവേദനം ചെയ്തതായി ത്വബ്റാനി(റ)യും ബൈഹഖി(റ)യും റിപ്പോർട്ട് ചെയ്യുന്നു:
അൻസ്വാരികളിൽപ്പെട്ട ഒരു സംഘം തിരുനബിﷺയുടെ അടുക്കൽ വന്ന് പറഞ്ഞു: “അല്ലാഹുവിന്റെ ദൂതരേﷺ, ഞങ്ങളുടെ ഒരു ഒട്ടകം ഒരു തോട്ടത്തിൽ അക്രമാസക്തനായി നിലയുറപ്പിച്ചിരിക്കുകയാണ്.” അപ്പോൾ തിരുനബിﷺ ആ ഒട്ടകത്തിനടുത്തേക്ക് ചെന്ന് അതിനോട് “ഇങ്ങോട്ട് വരൂ” എന്ന് കൽപ്പിച്ചു. ഉടനെ ആ ഒട്ടകം തന്റെ തല താഴ്ത്തി വിനയത്തോടെ അവിടുത്തെ അടുത്തേക്ക് വരികയും അവിടുന്ന് അതിനെ മൂക്കുകയറിട്ട് പിടിച്ച് അതിന്റെ ഉടമസ്ഥർക്ക് നൽകുകയും ചെയ്തു. അപ്പോൾ അബൂബക്കർ(റ) പറഞ്ഞു: “അല്ലാഹുവിന്റെ ദൂതരേﷺ, അങ്ങ് ഒരു പ്രവാചകനാണെന്ന് ആ ഒട്ടകം തിരിച്ചറിഞ്ഞതുപോലെ തോന്നുന്നു!” അപ്പോൾ അവിടുന്ന് പറഞ്ഞു:
“മനുഷ്യരിലെ സത്യനിഷേധികളൊഴികെ, ഈ രണ്ട് മലകൾക്കിടയിലുള്ള അഥവാ ഭൂമിയിലുള്ള മറ്റെല്ലാവർക്കും ഞാൻ അല്ലാഹുവിന്റെ പ്രവാചകനാണെന്ന് അറിയാം.”
اَللّٰهُمَّ صَلِّ عَلَى سَيِّدِنٰا مُحَمَّدٍ وَعَلَى آلِهِ وَصَحْبِهِ وَسَلِّمْ