Tweet 1166

കുടുംബത്തിലുള്ളവരെ പരമാവധി ചേർത്തുപിടിക്കാൻ ശ്രമിക്കുമ്പോൾ അവർ അകന്നു പോയാലും നാം ചേർത്തുനിർത്താനുള്ള ശ്രമങ്ങൾ തുടർന്നുകൊണ്ടേയിരിക്കണം. അത്തരം ആളുകൾക്ക് പ്രത്യേകം പുണ്യവും മഹത്വവുമുണ്ടെന്ന് തിരുനബിﷺ തന്നെ പഠിപ്പിക്കുന്നുണ്ട്. ഇമാം മുസ്‌ലിം(റ) നിവേദനം ചെയ്യുന്ന ഹദീസിൽ ഇങ്ങനെ കാണാം. അബൂഹുറൈറ(റ) ഉദ്ധരിക്കുന്നു. ഒരാൾ തിരുനബിﷺയോട് പറഞ്ഞു. അല്ലാഹുവിന്റെ ദൂതരെﷺ, എനിക്ക് ചില കുടുംബക്കാരുണ്ട്. ഞാൻ അവരോട് ബന്ധം ചേർക്കുന്നു. അവർ ബന്ധം വിച്ഛേദിക്കുന്നു. ഞാൻ അവരോട് നല്ല നിലയിൽ പെരുമാറുന്നു. അവരെന്നോട് മോശമായി പ്രതികരിക്കുന്നു. ഞാനവർക്കുവേണ്ടി ക്ഷമിക്കുന്നു. അവർ എന്നോട് അവിവേകമായി പെരുമാറുന്നു. അപ്പോൾ തിരുനബിﷺ പറഞ്ഞു. നീ ഇപ്പറയുന്നതുപോലെ തന്നെയാണ് വസ്തുത എങ്കിൽ, നീ അവരെ ചൂടുള്ള വെണ്ണീർ തീറ്റിയതു പോലെയാണ്. ഈ സമീപനം നീ നിലനിർത്തുമ്പോഴെല്ലാം അല്ലാഹുവിങ്കൽ നിന്ന് ഒരു സഹായി നിന്നോടൊന്നിച്ചുണ്ടായിരിക്കും.
നീ പുലർത്താൻ ശ്രമിക്കുന്ന ബന്ധം അവർ തകർക്കാൻ ഒരുങ്ങുമ്പോഴെല്ലാം ചൂടു വെണ്ണീർ കഴിക്കും പോലെ അവർ കുറ്റം ചെയ്തുകൊണ്ടിരിക്കുകയാണ്. ബന്ധം ചേർക്കാൻ ശ്രമിക്കുന്ന നീ മാനസികമായി നൊമ്പരപ്പെടുമ്പോഴെല്ലാം അല്ലാഹു നിനക്ക് താങ്ങും തണലുമായി ഉണ്ടാകും. എത്ര പ്രതികൂല സാഹചര്യമുണ്ടായാലും ബന്ധം പുലർത്താൻ ശ്രമിക്കണമെന്നും. അങ്ങനെ ശ്രമിക്കുന്നവരോട് അനുകൂലമായി പ്രതികരിച്ചില്ലെങ്കിൽ അത് ശിക്ഷിക്കാൻ കാരണമാകുമെന്നും ഒരുമിച്ചു പഠിപ്പിക്കുന്ന നിവേദനമാണിത്.
ബന്ധങ്ങൾ നിലനിർത്താനും കുടുംബബന്ധങ്ങൾ പുലർത്താനും എപ്പോഴും ആവശ്യമായി വരുന്നത് വിട്ടുവീഴ്ചയും താഴ്മയും ഒക്കെയാണ്. ദുരഭിമാനം ചിന്തിച്ച് പലരും വിട്ടുവീഴ്ചയ്ക്ക് തയ്യാറാവാതെ മാറിനിൽക്കും. യഥാർത്ഥത്തിൽ അവർ ഗുരുതരമായ അബദ്ധത്തിലേക്കാണ് അത് വഴി ചെന്ന് ചാടുക. വിനയം കാണിക്കുകയും നന്മയ്ക്കുവേണ്ടി താഴ്മയിൽ വർത്തിക്കുകയും ചെയ്താൽ അവർക്ക് അല്ലാഹു ഔന്നിത്യം നൽകുമെന്നും ഹദീസ് പഠിപ്പിക്കുന്നുണ്ട്. ഇമാം മുസ്‌ലിം(റ) തന്നെ നിവേദനം ചെയ്യുന്ന ഒരു ഹദീസിന്റെ ആശയം ഇങ്ങനെയാണ്. അബൂഹുറൈറ(റ) ഉദ്ധരിക്കുന്നു. തിരുനബിﷺ പറഞ്ഞു. ധർമം ചെയ്തത് കാരണമായി ഒരു ധനത്തിലും കുറവ് വന്നിട്ടില്ല. വിട്ടുവീഴ്ച കാരണമായി അല്ലാഹു ഒരാൾക്കും പ്രതാപം ഉയർത്താതിരുന്നിട്ടില്ല. അല്ലാഹുവിന്‌ വേണ്ടി ആരെങ്കിലും വിനയം കാണിക്കുന്ന പക്ഷം അവരെ അല്ലാഹു ഉയർത്താതിരിക്കുകയുമില്ല.
ഒരുപക്ഷേ അവിശ്വാസികളായ കുടുംബക്കാർ ഉണ്ടെങ്കിൽ അവരോടും കുടുംബബന്ധം എന്ന നിലയിൽ ചില കടപ്പാടുകളും വ്യവഹാരങ്ങളുമുണ്ട്. മുറിഞ്ഞുപോകാത്ത ചില വേരുകളും ചില്ലകളുമുണ്ടാകും. ഇമാം ബുഖാരി(റ) നിവേദനം ചെയ്യുന്ന ഒരു ഹദീസിന്റെ ആശയം ഇപ്രകാരമാണ്. അംറ് ബ്നുൽ ആസ്(റ)വിൽനിന്ന് നിവേദനം. തിരുനബിﷺ രഹസ്യമായിട്ടല്ല, പരസ്യമായിത്തന്നെ പറയുന്നത് ഞാൻ കേട്ടു. ഇന്ന വ്യക്തിയുടെ കുടുംബം എന്റെ രക്ഷകരല്ല. എന്റെ രക്ഷകർ അല്ലാഹുവും സദ് വൃത്തരായ സത്യവിശ്വാസികളുമാണ്. എങ്കിലും അവരുമായി എനിക്ക് കുടുംബബന്ധമുണ്ട്. അതു പ്രകാരം ഞാൻ ബന്ധം ചേർക്കുകതന്നെ ചെയ്യും.
ഇമാം ബുഖാരി(റ) തന്നെ നിവേദനം ചെയ്യുന്ന മറ്റൊരു ഹദീസിന്റെ ആശയം കൂടി വായിക്കാം. അസ്മാഅ് ബിന്‍ത് അബൂബക്കർ(റ) പറയുന്നു. എന്റെ മാതാവ് എന്റെ അടുക്കല്‍ വന്നു. അപ്പോള്‍ അവർ ബഹുദൈവ വിശ്വാസിനി ആയിരുന്നു. അഥവാ ഇസ്‌ലാം സ്വീകരിച്ചിരുന്നില്ല. ഞാന്‍ തിരുനബിﷺയോട് ചോദിച്ചു. ഇവർ ബഹുദൈവ വിശ്വാസിനിയാണ്. ഇവരുടെ കാര്യത്തില്‍ ഞാന്‍ എന്താണ് ചെയ്യേണ്ടത്. ഞാന്‍ എന്റെ മാതാവിനോട് കുടുംബബന്ധം പുലർത്തെട്ടയോ? അപ്പോൾ അവിടുന്ന് പറഞ്ഞു. നീ നിന്റെ ഉമ്മയുമായി നല്ല ബന്ധം പുലർത്തിക്കൊള്ളുക.
اَللّٰهُمَّ صَلِّ عَلَى سَيِّدِنٰا مُحَمَّدٍ وَعَلَى آلِهِ وَصَحْبِهِ وَسَلِّمْ