ഇമാം ബൈഹഖി(റ) അബൂ ഉമാമ(റ)യിൽ നിന്ന് നിവേദനം ചെയ്യുന്നു: തിരുനബിﷺ ഒരു യുദ്ധത്തിനു പുറപ്പെടാൻ ഒരുങ്ങി. ഞാൻ അവിടുത്തെ അടുക്കൽ ചെന്ന് പറഞ്ഞു: “അല്ലാഹുവിന്റെ തിരുദൂതരെﷺ, എനിക്ക് രക്തസാക്ഷിത്വം ലഭിക്കാൻ വേണ്ടി പ്രാർത്ഥിക്കേണമേ.” അപ്പോൾ അവിടുന്ന് പറഞ്ഞു: “അല്ലാഹുവേ, അവരെ നീ സുരക്ഷിതരാക്കുകയും യുദ്ധമുതൽ നൽകുകയും ചെയ്യേണമേ.” അങ്ങനെ ഞങ്ങൾ യുദ്ധം ചെയ്തു, സുരക്ഷിതരായി മടങ്ങുകയും ഗനീമത്ത് നേടുകയും ചെയ്തു. പിന്നീട് മറ്റൊരു യുദ്ധസമയം. ഞാൻ അവിടുത്തെ അടുക്കൽ ചെന്ന് പറഞ്ഞു: “അല്ലാഹുവിന്റെ തിരുദൂതരെﷺ, എനിക്ക് രക്തസാക്ഷിത്വം ലഭിക്കാൻ വേണ്ടി പ്രാർത്ഥിക്കണമേ.” അപ്പോൾ അവിടുന്ന് പറഞ്ഞു: “അല്ലാഹുവേ, അവരെ നീ സുരക്ഷിതരാക്കുകയും ഗനീമത്ത് നൽകുകയും ചെയ്യേണമേ.” അങ്ങനെ ഞങ്ങൾ യുദ്ധം ചെയ്തു, സുരക്ഷിതരായി മടങ്ങുകയും ഗനീമത്ത് നേടുകയും ചെയ്തു.
കുട്ടിയായിരിക്കുമ്പോൾ നബിﷺയെ സേവിച്ചിരുന്ന ബക്‌ർ ബിൻ ശിദാഖ് അലൈസി(റ) പ്രായപൂർത്തിയായപ്പോൾ തിരുനബിﷺയുടെ അടുക്കൽ വന്ന് പറഞ്ഞു: “അല്ലാഹുവിന്റെ തിരുദൂതരെﷺ, ഞാൻ അവിടുത്തെ വീട്ടുകാരുടെ അടുക്കൽ പ്രവേശിക്കാറുണ്ടായിരുന്നു. ഇപ്പോൾ ഞാൻ പുരുഷന്മാരുടെ പ്രായത്തിൽ എത്തിയിരിക്കുന്നു.” അപ്പോൾ തിരുനബിﷺ പറഞ്ഞു: “അല്ലാഹുവേ, അദ്ദേഹത്തിന്റെ വാക്കിനെ നീ സത്യപ്പെടുത്തുകയും അദ്ദേഹത്തിന് വിജയം നൽകുകയും ചെയ്യേണമേ.”
ഉമർ(റ) തന്റെ ഭരണകാലത്ത് ഒരു യഹൂദിയെ വധിച്ച സംഭവം നടന്നു. ഉമർ(റ) അതിനെ ഗൗരവമായി കാണുകയും ആകുലപ്പെടുകയും ചെയ്തുകൊണ്ട് മിമ്പറിൽ കയറി പ്രസംഗിച്ചു: “അല്ലാഹു എന്നെ അധികാരപ്പെടുത്തുകയും പുരുഷന്മാരെ വധിക്കുന്ന കാര്യത്തിൽ എന്നെ ഖലീഫയാക്കുകയും ചെയ്തിട്ടുള്ളത് ഈ രീതിയിലല്ല. ഇതിനെക്കുറിച്ച് എന്തെങ്കിലും അറിവുള്ളവർ എന്നെ അറിയിക്കണമെന്ന് അല്ലാഹുവിനെ സാക്ഷിയാക്കി ഞാൻ ഉണർത്തുന്നു.”
അപ്പോൾ ബക്‌ർ ബിൻ ശിദാഖ്(റ) എഴുന്നേറ്റുനിന്ന് പറഞ്ഞു: “ഞാനാണ് അത് ചെയ്തത്.” ഉമർ(റ) പറഞ്ഞു: “അല്ലാഹു അക്ബർ! നീ ഒരാളുടെ രക്തത്തിന്റെ ഉത്തരവാദിയായിരിക്കുന്നു, അതിനുള്ള ന്യായീകരണം കൊണ്ടുവരൂ.” അദ്ദേഹം പറഞ്ഞു: “തീർച്ചയായും ഒരു വ്യക്തി യുദ്ധത്തിന് പുറപ്പെടുകയും തന്റെ കുടുംബത്തെ നോക്കാൻ എന്നെ ചുമതലപ്പെടുത്തുകയും ചെയ്തു. അങ്ങനെ ഞാൻ അദ്ദേഹത്തിന്റെ വാതിൽക്കൽ ചെന്നപ്പോൾ ഈ യഹൂദിയെ അവന്റെ വീട്ടിൽ കണ്ടു. അവൻ ഇങ്ങനെ പാടുന്നുണ്ടായിരുന്നു:
‘ഇസ്‌ലാം വഞ്ചിച്ച മുടി കോതിയവൻ… മുഴുവൻ രാത്രിയും ഞാൻ അവന്റെ ഭാര്യയുമായി ഏകാന്തനായി കഴിഞ്ഞു.
അവളുടെ മാറോടണഞ്ഞു ഞാൻ കിടക്കുന്നു, നീളമുള്ള ഒട്ടകപ്പുറത്ത് കയറി അവൻ വൈകുന്നു…
അതിന്റെ വാരിയെല്ലുകൾ ഒത്തുകൂടുന്നത് കണ്ടാല്‍… ഒരു ജനത മറ്റൊരു ജനതയിലേക്ക് എഴുന്നേറ്റു വരുന്നത് പോലെയുണ്ട്.’
അങ്ങനെ ഉമർ(റ) അദ്ദേഹത്തിന്റെ വാക്ക് സത്യപ്പെടുത്തുകയും, തിരുനബിﷺയുടെ പ്രാർത്ഥനയുടെ ഫലത്താൽ അദ്ദേഹത്തിന്റെ രക്തത്തിന്റെ ബാധ്യത ഒഴിവാക്കിക്കൊടുക്കുകയും ചെയ്തു.
اَللّٰهُمَّ صَلِّ عَلَى سَيِّدِنٰا مُحَمَّدٍ وَعَلَى آلِهِ وَصَحْبِهِ وَسَلِّمْ