ഈസാ ഇബ്നു മർയം(അ)ന്റെ ആഗമനത്തെ കുറിച്ച് തിരുനബിﷺയുടെ അറിയിപ്പ് ഇങ്ങനെ വായിക്കാം.
സമറ(റ)വിൽ നിന്ന് നിവേദനം ചെയ്യുന്നു; തിരുനബിﷺ പറഞ്ഞു: “തീർച്ചയായും ദജ്ജാൽ പുറപ്പെടുക തന്നെ ചെയ്യും. അവൻ ഇടതു കണ്ണ് കാണാത്തവനായിരിക്കും, അതിൽ കട്ടിയുള്ള മാംസവളർച്ചയുണ്ടാകും. അവൻ ജന്മനാ കാഴ്ചയില്ലാത്തവരെയും കുഷ്ഠ രോഗികളെയും സുഖപ്പെടുത്തുകയും മരിച്ചവരെ ജീവിപ്പിക്കുകയും ചെയ്യും. അവൻ ആളുകളോട് പറയുകയും ചെയ്യും: ‘ഞാനാണ് നിങ്ങളുടെ രക്ഷിതാവ്.’ അതിനാൽ ആരെങ്കിലും ‘നീയാണ് എന്റെ രക്ഷിതാവ്’ എന്ന് പറഞ്ഞാൽ അവൻ പരീക്ഷണത്തിൽ അകപ്പെട്ടുപോയി. എന്നാൽ ആരെങ്കിലും ‘എന്റെ രക്ഷിതാവ് അല്ലാഹുവാണ്’ എന്ന് പറയുകയും ആ വിശ്വാസത്തിൽ മരിക്കുകയും ചെയ്താൽ അവൻ ദജ്ജാലിന്റെ ഫിത്നയിൽ നിന്ന് സംരക്ഷിക്കപ്പെട്ടു; അവന് മറ്റ് ആപത്തുകളൊന്നുമില്ല. അല്ലാഹു ഉദ്ദേശിച്ചത്ര കാലം അവൻ ഭൂമിയിൽ കഴിച്ചുകൂട്ടും. പിന്നീട് പടിഞ്ഞാറു ഭാഗത്തുനിന്ന് മുഹമ്മദ്ﷺനെ സത്യപ്പെടുത്തിക്കൊണ്ട് ഈസാ ഇബ്നു മർയം(അ) വരികയും ദജ്ജാലിനെ വധിക്കുകയും ചെയ്യും. അത് അന്ത്യദിനം ആസന്നമായി എന്നറിയിക്കും.”
ഹാകിം(റ), അബൂഹുറൈറ(റ)വിൽ നിന്ന് നിവേദനം ചെയ്യുന്നു; തിരുനബിﷺ പറഞ്ഞു:
“അല്ലാഹുവിന്റെ റൂഹായ ഈസാ ഇബ്നു മർയം(അ) നിങ്ങൾക്കിടയിലേക്ക് ഇറങ്ങിവരും. അതിനാൽ നിങ്ങൾ അവിടുത്തെ കണ്ടാൽ തിരിച്ചറിയുക: ചുവപ്പും വെളുപ്പും കലർന്ന മിതമായ ശരീരപ്രകൃതിയുള്ള ആളായിരിക്കും. മഞ്ഞച്ചായം മുക്കിയ രണ്ട് വസ്ത്രങ്ങൾ അണിഞ്ഞിരിക്കും. നനവ് തട്ടിയില്ലെങ്കിലും അവിടുത്തെ ശിരസ്സിൽ നിന്ന് വെള്ളത്തുള്ളികൾ ഇറ്റുവീഴുന്നതായി തോന്നും. അവിടുന്ന് കുരിശ് തകർക്കുകയും പന്നിയെ കൊല്ലുകയും ജിസ്യ നിർത്തലാക്കുകയും ചെയ്യും, ആളുകളെ ഇസ്ലാമിലേക്ക് ക്ഷണിക്കുകയും ചെയ്യും. അവിടുത്തെ കാലത്ത് അല്ലാഹു മസീഹുദ്ദജ്ജാലിനെ നശിപ്പിക്കും. ഭൂമിയിലുള്ളവർക്ക് സമാധാനം കൈവരും; സിംഹങ്ങൾ ഒട്ടകങ്ങളോടൊപ്പവും പുലികൾ പശുക്കളോടൊപ്പവും ചെന്നായ്ക്കൾ ആടുകളോടൊപ്പവും മേഞ്ഞുനടക്കും. കുട്ടികൾ പാമ്പുകളുമായി കളിക്കും, അവ അവരെ ഉപദ്രവിക്കുകയുമില്ല. അവിടുന്ന് നാൽപ്പത് വർഷം ഭൂമിയിൽ കഴിച്ചുകൂട്ടും. അതിനുശേഷം അവിടുന്ന് മരണപ്പെടുകയും മുസ്ലിംകൾ അവിടുത്തെ ജനാസ നിസ്കരിക്കുകയും ചെയ്യും.”
ഇബ്നു ഉമർ(റ)വിൽ നിന്ന് നിവേദനം ചെയ്യുന്നു; തിരുനബിﷺ പറഞ്ഞു: “എന്റെ സമുദായത്തിൽ ദജ്ജാൽ പുറപ്പെടും. അവൻ നാൽപ്പത് ദിവസമോ മാസമോ വർഷമോ എന്ന് എനിക്കറിയില്ല കഴിച്ചുകൂട്ടും. അപ്പോൾ അല്ലാഹു ഉർവത്തുബ്നു മസ്ഊദ് അൽ ഥഖഫിയെപ്പോലെയുള്ള ഈസാ ഇബ്നു മർയമി(അ)നെ അയക്കും. അവിടുന്ന് ദജ്ജാലിനെ അന്വേഷിച്ചു കണ്ടെത്തുകയും അവനെ നശിപ്പിക്കുകയും ചെയ്യും. പിന്നീട് ജനങ്ങൾ ഏഴ് വർഷം കഴിച്ചുകൂട്ടും; രണ്ടുപേർക്കിടയിൽ പോലും യാതൊരു ശത്രുതയും ഉണ്ടായിരിക്കില്ല. അതിനുശേഷം ശാം ഭാഗത്തുനിന്ന് അല്ലാഹു തണുത്ത ഒരു കാറ്റ് അയക്കും. ഭൂമുഖത്ത് തന്റെ ഹൃദയത്തിൽ അണു അളവ് ഈമാൻ ഉള്ള ഒരാളെപ്പോലും അത് ജീവനോടെ ബാക്കിവെക്കില്ല, അവരുടെ ആത്മാവിനെ അത് പിടിച്ചെടുക്കും. പിന്നീട് പക്ഷികളുടെ വേഗതയും വന്യമൃഗങ്ങളുടെ സ്വഭാവവും ഉള്ള ചീത്ത മനുഷ്യർ മാത്രമായിരിക്കും ബാക്കിയാവുക. അവർ നന്മയെ തിരിച്ചറിയുകയോ തിന്മയെ എതിർക്കുകയോ ഇല്ല. അപ്പോൾ പിശാച് അവരുടെ മുന്നിൽ പ്രത്യക്ഷപ്പെട്ട് ചോദിക്കും: ‘നിങ്ങൾ ഉത്തരം നൽകുന്നില്ലേ?’ അവർ ചോദിക്കും: ‘നീ ഞങ്ങളോട് എന്താണ് കൽപ്പിക്കുന്നത്?’ അവൻ അവരോട് വിഗ്രഹങ്ങളെ ആരാധിക്കാൻ കൽപ്പിക്കും, അവർ അതിനെ ആരാധിക്കുകയും ചെയ്യും. ആ അവസ്ഥയിലും അവർക്ക് ധാരാളം ഉപജീവനവും നല്ല ജീവിതവും ഉണ്ടായിരിക്കും.
പിന്നീട് കാഹളത്തിൽ ഊതപ്പെടും. അത് കേൾക്കുന്ന ഏതൊരാളും കഴുത്തിന്റെ ഒരു ഭാഗം താഴ്ത്തുകയും മറുഭാഗം ശ്രദ്ധിച്ചും കേൾക്കും. അത് ആദ്യം കേൾക്കുന്നത് തന്റെ ഒട്ടകങ്ങളുടെ തൊട്ടി നന്നാക്കിക്കൊണ്ടിരിക്കുന്ന ഒരു മനുഷ്യനായിരിക്കും. അവൻ ബോധരഹിതനായി വീഴും, ജനങ്ങളും ബോധരഹിതരായി വീഴും. പിന്നീട് അല്ലാഹു പുകമഞ്ഞുപോലെയുള്ള ഒരു മഴ വർഷിപ്പിക്കും. അതിലൂടെ മനുഷ്യരുടെ ശരീരങ്ങൾ മുളച്ചുവരും. പിന്നീട് അതിൽ രണ്ടാമതും ഊതപ്പെടും, അപ്പോൾ അവർ എഴുന്നേറ്റ് നിൽക്കുന്നവരായി നോക്കും.
പിന്നീട് പറയപ്പെടും: ‘ഓ മനുഷ്യരെ, നിങ്ങളുടെ രക്ഷിതാവിലേക്ക് വരൂ, അവരെ നിർത്തിവെക്കുക, തീർച്ചയായും അവർ ചോദ്യം ചെയ്യപ്പെടേണ്ടവരാണ്. അതിനുശേഷം പറയപ്പെടും: ‘നരകത്തിലേക്ക് പോകുന്നവരെ പുറത്തെടുക്കുക.’ ‘എത്രയിൽ നിന്നാണ്?’ എന്ന് ചോദിക്കപ്പെടും. ‘ഓരോ ആയിരത്തിൽ നിന്നും തൊള്ളായിരത്തി തൊണ്ണൂറ്റി ഒമ്പത് പേർ’ എന്ന് മറുപടി നൽകപ്പെടും. അത് കുട്ടികളെ നരപ്പിക്കുന്ന ദിവസമാണ്, കാര്യം അതീവ ഗുരുതരമാകുന്ന ദിവസവുമാണത്.”
اَللّٰهُمَّ صَلِّ عَلَى سَيِّدِنٰا مُحَمَّدٍ وَعَلَى آلِهِ وَصَحْبِهِ وَسَلِّمْ