Tweet 1149

ഇമാം ത്വബ്റാനി(റ) നിവേദനം ചെയ്യുന്നു. ബിലാൽ ഹാരിസ് അൽ മുസനി(റ)ക്ക് ഖബുലിയ്യയിലെ ഖനികൾ വിഹിതം വെച്ചു നൽകി. അവിടുത്തെ ഉയർന്ന പ്രദേശങ്ങളും താഴ്ന്ന പ്രദേശങ്ങളും പ്രത്യേകം നിർണയിച്ചു കൊടുത്തു. കൃഷിയോഗ്യമായ ഇടങ്ങളിൽ കൃഷി ചെയ്യാനും അവകാശം നൽകി.
മദീനക്കടുത്ത് ഫർഅ് താഴ്‌വരയിലെ സവിശേഷമായ ഭൂമി ഫലമെടുക്കാനും പരിസരങ്ങളിൽ കൃഷി ചെയ്യാനും അനുയായികളിൽ ഒരാൾക്ക് തിരുനബിﷺ ക്രമീകരണങ്ങൾ ചെയ്തു കൊടുത്തതാണ് നാം വായിച്ചത്. ദാനധർമങ്ങൾക്ക് പുറമേ സംരംഭങ്ങൾക്കുള്ള പ്രേരണയും പ്രകൃതി വിഭവങ്ങളോട് പ്രത്യുൽപാദനപരമായി സമീപിക്കാനുള്ള വിചാരവും ഉണർത്തുന്നതാണ് ഈ നിവേദനം. വ്യത്യസ്ത തലങ്ങളിൽ കൃഷി ചെയ്യാനും കാർഷിക ഉത്പന്നങ്ങൾ വിളയിച്ചെടുക്കാനും ആളുകൾക്ക് പ്രചോദനം നൽകുന്ന അധ്യാപനങ്ങൾ വേറെയും നിവേദനങ്ങളിൽ കാണാൻ കഴിയും. ഫലഭൂയിഷ്ടമായ ഭൂമി വെറുതെ ഇടരുതെന്നും അത് കൃത്യമായി പ്രയോജനപ്പെടുത്തണമെന്നുമാണ് പ്രവാചക അധ്യാപനങ്ങളുടെ പൊരുൾ. ഭൂപ്രദേശങ്ങൾ കാർഷികയോഗ്യമാക്കുന്നതും ജീവന പ്രവർത്തനങ്ങളിലൂടെ മുന്നോട്ടുവരുന്നതും ഏറെ പ്രോത്സാഹിപ്പിക്കുന്ന സമീപനമാണ് തിരുനബിﷺയുടെ അധ്യാപനങ്ങളിൽ മുഴുവനും കാണാൻ കഴിയുന്നത്.
ചില പ്രദേശങ്ങളിലെ ഭൂവിഭാഗങ്ങളെ കാർഷിക യോഗ്യമാക്കാനും പരിപാലിച്ചു വികസിപ്പിച്ചെടുക്കാനും നിർണിത വ്യക്തികളെ ചുമതലപ്പെടുത്തി കൊണ്ടുള്ള കരാറുകളും ഹദീസുകളിൽ നിന്നും മറ്റും വായിക്കാൻ കഴിയും.
ബനൂ നദീർ ഗോത്രത്തിലെ ഭൂപ്രദേശങ്ങൾ സുബൈറി(റ)ന് പതിച്ചു കൊടുത്തതും അബൂ ഹുറൈറ(റ)യിൽ നിന്ന് ഇമാം ബുഖാരി(റ) നിവേദനം ചെയ്തിട്ടുണ്ട്.
മുജാഅതു ബിനു മുറാറ(റ) പറയുന്നു. യമാമയിലെ ഔദാ എന്ന് പേരുള്ള ഭൂമി തിരുനബിﷺ അദ്ദേഹത്തിനു പതിച്ചു നൽകി.
അല്ലാഹുവിൻ്റെ ദൂതൻ മുഹമ്മദ് നബിﷺ മുജാഅതു ബിനു മുറാറ(റ)ക്ക് രേഖാമൂലം എഴുതിത്തരുന്നു എന്ന കരാറിനെക്കുറിച്ചും ഹദീസിൽ പരാമർശമുണ്ട്.
അഖീഖ് താഴ്‌വരയിലെ കിണറുകൾ ഹിജ്റ ചെയ്തു വന്ന തന്റെ വലിയുമ്മക്ക് നൽകിയിരുന്നു എന്ന് സായ്ബ്(റ) എന്ന സ്വഹാബി പറയുന്നുണ്ട്.
എനിക്കും അബൂബക്കറി(റ)നും പ്രത്യേക ഭൂമികൾ നിശ്ചയിച്ചു തന്നിരുന്നു എന്ന് റബീഅതുൽ അസ്‌ലമി(റ) എന്ന സ്വഹാബി പറഞ്ഞ കാര്യം ഇമാം അഹ്മദ്(റ) നിവേദനം ചെയ്ത ഹദീസിലുണ്ട്.
സ്വഹാബികൾക്കും ആവശ്യക്കാർക്കും തിരുനബിﷺ ഭൂമിയും പ്രദേശങ്ങളും വിഭവങ്ങളും നിശ്ചയിച്ചു നൽകിയപ്പോൾ സ്വയം പരിത്യാഗത്തെ അടയാളപ്പെടുത്തുകയും സാമ്പത്തികമായ ലക്ഷ്യങ്ങളോടെയല്ല തിരുനബിﷺയുടെ പ്രബോധനം എന്ന് സ്വഹാബികളെയും മറ്റുള്ളവരെയും ബോധ്യപ്പെടുത്താൻ സാധിക്കുകയും ചെയ്തു.
മക്കൾക്കും കുടുംബത്തിനും അനന്തര സ്വത്തുക്കൾ ഒന്നും വെക്കാതെയും സാമ്പത്തികമായ ആസ്തിയോ ആഢ്യത്വമോ ആവശ്യപ്പെടാതെയും സ്വയം ഭൗതികവിരക്തിയോടെ ജീവിക്കുകയും മറ്റുള്ളവർക്ക് അല്ലാഹു അനുവദിച്ചു കൊടുത്ത സമ്പാദ്യങ്ങളും ക്ഷേമ വികസന വഴികളും സുതാര്യമായി തുറന്നുകൊടുക്കുകയും ചെയ്ത ആശ്ചര്യകരമായ ഒരു സാമ്പത്തിക വ്യവഹാരത്തിന്റെ വിലാസം കൂടിയാണ് തിരുനബിﷺ. ഉഹദ് പർവതം സ്വർണ്ണമായി എൻ്റെ അടുക്കൽ വന്നാൽ അതിൽ നിന്ന് ഒരു ഒരു ദിർഹമിന്റെ അളവെങ്കിലും മൂന്നുദിവസത്തിലേറെ എൻ്റെ പക്കലുണ്ടായിരിക്കാൻ ഞാൻ ആഗ്രഹിക്കുന്നില്ല. എല്ലാം ചെലവഴിക്കാനും വല്ല കടബാധ്യതകളുമുണ്ടെങ്കിൽ അതിനു വേണ്ടി മാത്രം കരുതി വെക്കാനും മാത്രമേ ഞാൻ ആഗ്രഹിക്കുന്നുള്ളൂ എന്ന് തിരുനബിﷺ പറഞ്ഞ ഹദീസ് ഇമാം ബുഖാരി(റ) ഉദ്ധരിച്ചിട്ടുണ്ട്.
اَللّٰهُمَّ صَلِّ عَلَى سَيِّدِنٰا مُحَمَّدٍ وَعَلَى آلِهِ وَصَحْبِهِ وَسَلِّمْ