അലി(റ)വിൽ നിന്ന് ഇമാം ദൈലമി(റ) നിവേദനം ചെയ്യുന്നു; തിരുനബിﷺ പറഞ്ഞു: “ദജ്ജാൽ പുറപ്പെടും; അവനോടൊപ്പം നെയ്ത്തുകാരായ എഴുപതിനായിരം പേരുണ്ടാകും. അവരുടെ മുന്നണിയിൽ ഏറ്റവും കൂടുതൽ രോമമുള്ള ആളുണ്ടാകും; അവൻ ‘ബദൂ, ബദൂ’എന്ന് പറഞ്ഞു കൊണ്ടിരിക്കും.”
അബൂ സഈദ്(റ)വിൽ നിന്ന് നിവേദനം ചെയ്യുന്നു; തിരുനബിﷺ പറഞ്ഞു: “ദജ്ജാൽ പുറപ്പെടുമ്പോൾ സത്യവിശ്വാസികളിൽപ്പെട്ട ഒരാൾ അവന്റെ അടുത്തേക്ക് പുറപ്പെടും. അപ്പോൾ ദജ്ജാലിന്റെ ആയുധധാരികളായ കാവൽക്കാർ അദ്ദേഹത്തെ കണ്ടുമുട്ടും. അവർ അദ്ദേഹത്തോട് ചോദിക്കും: ‘നീ എവിടേക്കാണ് പോകുന്നത്?’ അദ്ദേഹം പറയും: ‘പുറപ്പെട്ടിട്ടുള്ള ഈ വ്യക്തിയുടെ അടുത്തേക്കാണ് ഞാൻ പോകുന്നത്.’
അവർ ചോദിക്കും: ‘ഞങ്ങളുടെ രക്ഷിതാവിൽ നീ വിശ്വസിക്കുന്നില്ലേ?’ അദ്ദേഹം പറയും: ‘ഞങ്ങളുടെ രക്ഷിതാവിനെക്കുറിച്ച് ഒരു ആശയക്കുഴപ്പവുമില്ല.’ അപ്പോൾ അവർ പറയും: ‘ഇവനെ വധിക്കൂ.’ എന്നാൽ അവരിൽ ചിലർ മറ്റ് ചിലരോട് പറയും: ദജ്ജാലിന്റെ അനുവാദമില്ലാതെ ആരെയും വധിക്കരുതെന്ന് അവൻ നിങ്ങളോട് വിലക്കിയിട്ടില്ലേ?’
അങ്ങനെ അവർ അദ്ദേഹത്തെ ദജ്ജാലിന്റെ അടുത്തേക്ക് കൊണ്ടുപോകും. സത്യവിശ്വാസി അവനെ കാണുമ്പോൾ പറയും: ‘ജനങ്ങളേ, തിരുനബിﷺ പ്രവചിച്ച ദജ്ജാൽ ഇതാകുന്നു!’
അപ്പോൾ ദജ്ജാൽ അദ്ദേഹത്തെക്കുറിച്ച് കൽപ്പിക്കുകയും അദ്ദേഹത്തെ കിടത്തുകയും ചെയ്യും. അവൻ പറയും: ‘ഇവനെ പിടിച്ച് തലയ്ക്കടിച്ച് പരിക്കേൽപ്പിക്കൂ.’ അങ്ങനെ അദ്ദേഹത്തിന്റെ മുതുകിലും വയറ്റിലും അടിച്ച് വിസ്തരിക്കും. തുടർന്ന് അവൻ ചോദിക്കും: ‘നീ എന്നിൽ വിശ്വസിക്കുന്നില്ലേ?’
അദ്ദേഹം പറയും: ‘നീ കള്ളനായ മസീഹ് തന്നെയാണ്.’
തുടർന്ന് കൽപ്പന നൽകപ്പെടുകയും അദ്ദേഹത്തിന്റെ തലയുടെ മധ്യത്തിൽ ഈർച്ചവാൾ വെച്ച് ഇരുകാലുകൾക്കുമിടയിലൂടെ ഈർന്ന് രണ്ടാക്കി മാറ്റുകയും ചെയ്യും. പിന്നീട് ദജ്ജാൽ ആ രണ്ട് കഷ്ണങ്ങൾക്കിടയിലൂടെ നടക്കും. ശേഷം അവനോട് ‘എഴുന്നേൽക്കൂ’ എന്ന് പറയും; അപ്പോൾ അദ്ദേഹം നിവർന്നുനിൽക്കും. ദജ്ജാൽ ചോദിക്കും: ‘ഇപ്പോൾ നീ എന്നിൽ വിശ്വസിക്കുന്നുവോ?’
അദ്ദേഹം പറയും: ‘നിന്നെക്കുറിച്ചുള്ള എന്റെ ഉൾക്കാഴ്ച വർദ്ധിക്കുക മാത്രമാണ് ചെയ്തത്.’ തുടർന്ന് അദ്ദേഹം പറയും: ‘ജനങ്ങളേ, എനിക്ക് ശേഷം മനുഷ്യരിൽ മറ്റൊരാളോടും ഇവന് ഇത് ചെയ്യാൻ കഴിയില്ല!’
അപ്പോൾ ദജ്ജാൽ അദ്ദേഹത്തെ അറുക്കാനായി പിടിക്കും. എന്നാൽ അദ്ദേഹത്തിന്റെ കഴുത്ത് മുതൽ നെഞ്ചെല്ല് വരെയുള്ള ഭാഗം അല്ലാഹു ചെമ്പാക്കി മാറ്റും; അതിനാൽ അവന് അദ്ദേഹത്തിന്മേൽ യാതൊരു വഴിയും ഉണ്ടാകില്ല. തുടർന്ന് അവൻ അദ്ദേഹത്തിന്റെ കൈകളിലും കാലുകളിലും പിടിച്ച് വലിച്ചെറിയും. ജനങ്ങൾ വിചാരിക്കും അവൻ അദ്ദേഹത്തെ നരകത്തിലേക്കാണ് എറിഞ്ഞതെന്ന്; എന്നാൽ അദ്ദേഹം എറിയപ്പെട്ടത് സ്വർഗ്ഗത്തിലേക്കായിരിക്കും.” തിരുനബിﷺ പറഞ്ഞു: “ലോകരക്ഷിതാവിന്റെ അടുക്കൽ ഏറ്റവും മഹത്തായ രക്തസാക്ഷിത്വം വഹിക്കുന്ന വ്യക്തിയായിരിക്കും ഇത്.”
اَللّٰهُمَّ صَلِّ عَلَى سَيِّدِنٰا مُحَمَّدٍ وَعَلَى آلِهِ وَصَحْبِهِ وَسَلِّمْ